ပြိုင်ဘက်အသင်းဘက်ကို ဟက်ထရစ်သွင်းယူခဲ့ပေမယ့် အောင်ပွဲခံခြင်းမရှိခဲ့တဲ့ အဆန်စီယိုရဲ့ နောက်ကွယ်က အကြောင်းအရင်းတစ်ခု

စက်တင်ဘာလ (၂၃)ရက်နေ့ ယနေ့မနက်မှာတော့ ရီးရဲမက်ဒရစ်အသင်းနဲ့ မာလော့ကာအသင်းတို့ လာလီဂါပွဲစဥ်အဖြစ် ယှဥ်ပြိုင်ကစားခဲ့ကြပါတယ်။ အဆိုပါပွဲစဥ်မှာ နည်းပြအန်ဆယ်လော့တီကိုင်တွယ်နေတဲ့ ရီးရဲမက်ဒရစ်အသင်းက ​ ခြေစွမ်းကောင်းတွေ ပြသခဲ့ပြီး မာလော့ကာအသင်းကို ဂိုးပြတ်အနိုင်ရရှိခဲ့ပါတယ်။ ယခုပွဲစဥ်မှာ အကောင်းဆုံးခြေစွမ်းပြတဲ့ ကစားသမားကတော့ ရီးရဲအသင်းရဲ့ ကွင်းလယ်ကစားသမား မာကိုစ့် အဆန်စီယိုပဲ ဖြစ်ပါတယ်။

ပရိသတ်တွေအများအပြားက ရီးရဲအသင်းရဲ့အနာဂတ်ကြယ်ပွင့်ကစားသမားအဖြစ် သတ်မှတ်ခဲ့တဲ့အထိ ခြေစွမ်းကောင်းတွေပြသခဲ့တဲ့ အဆန်စီယိုကတော့ နောက်ပိုင်းမှာဒဏ်ရာပြဿနာတွေကြောင့် ရုန်းကန်နေရသူဖြစ်ပါတယ်။ယခုပွဲစဥ်မှာတော့ တစ်ချိန်တုန်းက တောက်ပခဲ့တဲ့ အဆန်စီယိုရဲ့ ​ခြေစွမ်းကောင်းတွေကို တစ်ဖန်ပြန်မြင်တွေ့ခဲ့ရပြီး ဟက်ထရစ်သွင်းဂိုး သွင်းယူနိုင်တဲ့အထိ ခြေစွမ်းပြခဲ့တာ ဖြစ်ပါတယ်။ အဆန်စီယိုကတော့ မာလော့ကာ အသင်းနဲ့ ပွဲစဥ်မှာ ဟက်ထရစ်သွင်းယူခဲ့ပေမယ့် အောင်ပွဲခံခြင်းမရှိခဲ့ပါဘူး။

အကြောင်းကတော့ အဆန်စီယို ဟက်ထရစ်သွင်းယူခဲ့တဲ့ မာလော့ကာအသင်းဟာ သူငယ်စဥ်ကတည်းက ကစားခဲ့တဲ့ အသင်းဟောင်းဖြစ်ပြီး အသင်းဟောင်းအပေါ် လေးစားမှုရှိကြောင်း ပြသတဲ့အနေနဲ့ အောင်ပွဲခံခြင်းမရှိခဲ့တာပဲ ဖြစ်ပါတယ်။ နာမည်ကြီးကစားသမားအချို့ဟာလည်း အသင်းဟောင်းကို ဂိုးပြန်သွင်းချိန်မှာ အောင်ပွဲခံခြင်းမရှိတဲ့ အမူအရာကိုပြုလုပ်လေ့ရှိကြကာ အဆိုပါအပြုအမှုဟာ ဘောလုံးလောကရဲ့ လှပတဲ့ အရာတစ်ခုဖြစ်ပါတယ်။အဆန်စီယိုရဲ့ ရီးရဲအသင်းတော့ လက်ရှိမှာ လာလီဂါအမှတ်ပေးဇယားရဲ့ အဆင့်(၁)နေရာကို ရောက်ရှိလာခဲ့ပါတယ်။

Source :  Original Uploder