သွားကြားထိုးတံ သုံးသင့်၊ မသုံးသင့်

သစ်သားသွားကြားထိုးတံပဲဖြစ်ဖြစ်၊ ပလတ်စတစ်ပဲဖြစ်ဖြစ် ဂရုတစိုက်နဲ့ ညင်ညင်သာသာမသုံးရင်တော့ သွား၊ အထူးသဖြင့် သွားဖုံးတွေကို ပျက်စီးစေနိုင်ပါတယ်။

♦ သွားကြားထိုးတံထက် ကောင်းတဲ့အရာတွေ ရှိပါတယ်။

သွားကြားထိုးတံနဲ့ ညင်သာစွာ ထိုးမယ်ဆိုရင်တော့ အဆင်ပြေပေမယ့် သွားပွတ်ကြိုးက ပိုပြီးကောင်းပါတယ်။ သွားကြားထိုးတဲ့ အကြိမ်ရေ များလေလေ သွားကို ထိခိုက်နိုင်ခြေ များလေလေပါပဲ။ မကြာခဏ သွားကြားညပ်တတ်တယ် ဆိုရင်တော့ သွားဆရာဝန်နဲ့ ပြသပြီး ဖြစ်ရတဲ့အကြောင်းအရင်းကို ရှာဖွေကုသရပါမယ်။

♦ မကြာခဏ သွားကြားညပ်တတ်ပါသလား?

သွားကြားညပ်တတ်တဲ့ အကြောင်းအရင်းတွေကတော့ သွားဖာတဲ့ပုံစံမမှန်ခြင်း၊ သွားယိုင်ခြင်း၊ အစာဝင်နိုင်တဲ့ သွားအခေါင်းပေါက်ဖြစ်နေခြင်း စတာတွေ ဖြစ်ပါတယ်။ ဒီပြဿနာတွေကို မဖြေရှင်းဘူးဆိုရင် နောက်မှာ သွားအမြစ်အထိ လှိုက်စားပြီး ရောဂါပိုကြီးလာနိုင်ပါတယ်။

မကြာခဏ သွားကြားထိုးတဲ့အကျင့် ရှိတယ်ဆိုရင် သွားနဲ့သွားဖုံး ထိခိုက်မှု ရှိ၊ မရှိ သွားဆရာဝန်နဲ့ စစ်ဆေးကြည့်ရပါမယ်။ အကောင်းဆုံးကတော့ သွားပွတ်ကြိုးသုံးတာ ဖြစ်ပါတယ်။

♦ အကောင်းဆုံး သွားပွတ်ကြိုး သုံးနည်းများ

သွားပွတ်ကြိုးကို လက်ညှိုးနှစ်ချောင်းမှာ ရစ်ပတ်လိုက်ပြီးတော့ သွားကြားမှာ ညင်သာစွာ လျောတိုက်ပါ။ သွားကြားထဲကို သွားပွတ်ကြိုး ဝင်သွားပြီဆိုရင် သွားနှစ်ဖက်စလုံးကို သေချာတိုက်ဖို့ အရေးကြီးပါတယ်။ သွားကြားထဲမှာပဲ အပေါ်အောက် တိုက်မနေဘဲ သွားပွတ်ကြိုးကို သွားမှာ ရစ်ပတ်လိုက်ပြီးတော့ သွားပွတ်ကြိုးကို ပါးစပ်အရှေ့ဘက်ကို ချပြီး အပေါ်အောက်သေချာ ၃-၄ ကြိမ်လောက် ပွတ်တိုက်ပေးပါ။

အနည်းဆုံး တစ်နေ့ကို တစ်ကြိမ် ပွတ်တိုက်ပေးဖို့ အကြံံပြုချင်ပါတယ်။ နှစ်ကြိမ်တိုက်နိုင်ရင်တော့ ပိုကောင်းပါတယ်။

Source : Dr. Mya Myo Myo Swe