အမေရိကန်နိုင်ငံ စက်ရုံတခုတွင်း ဓားထိုးလူသတ်မှုဖြင့် မြန်မာတဦး ဖမ်းဆီးခံရ

အမေရိကန်နိုင်ငံ စက်ရုံတခုအတွင်းမှာ မြန်မာနိုင်ငံသား အမျိုးသားတဦးဟာ လုပ်ဖော်ကိုင်ဘက် ၂ ဦးကို ဓားနဲ့ထိုးခဲ့ပြီး တဦးသေဆုံးကာ နောက်တဦးကတော့ ထိခိုက်ဒဏ်ရာတွေ ရခဲ့တဲ့အတွက် ဖမ်းဆီးခံခဲ့ရပါတယ်။

ဒီအဖြစ်အပျက်ဟာ ဒီဇင်ဘာ ၅ ရက်နေ့က မြောက်ကာရိုလိုင်းနားပြည်နယ်၊ ဝက်လ်စ်ဘိုရိုမြို့ စက်ရုံတခုထဲမှာ ဖြစ်ခဲ့တာပါ။

ဟိုက်ပွိုင့်မြို့မှာနေထိုင်သူ မြန်မာအမျိုးသား ကိုစိန်ဝင်းကို တိုင်ဆန် နို့ထွက်ပစ္စည်းစက်ရုံထဲမှာ ညနေ ၅း၄၅ နာရီလောက်က ဖမ်းဆီးနိုင်ခဲ့တယ်လို့ myfox8 သတင်းတပုဒ်မှာ ဖော်ပြပါတယ်။

သူတို့ ၃ ဦးစလုံးဟာ စက်ရုံမှာ အလုပ်လုပ်ကိုင်နေကြတာဖြစ်ပြီး ခိုက်ရန်ဖြစ်ပွားခဲ့ချိန်မှာ ကိုစိန်ဝင်းက ဓားနဲ့ အကြိမ်ကြိမ်ထိုးခဲ့တာဖြစ်တယ်လို့ မျက်မြင်သက်သေတွေရဲ့ ထွက်ဆိုချက်ကို ကိုးကားပြီး ဝက်လ်စ်ဘိုရိုရဲတွေက ပြောပါတယ်။

ဝက်လ်စ်ဘိုရိုမြို့မြောက်ပိုင်းမှာ နေထိုင်သူ မာကို မာရီယာနို အယ်လ်ဗာဟာ ဒဏ်ရာတွေနဲ့ ၀ိတ်ခ်ဖောရက်စ်ဆေးရုံကို ရောက်ရှိခဲ့့ချိန်မှာ သေဆုံးသွားခဲ့တာဖြစ်ပြီး နောက်တဦးဖြစ်တဲ့ လီနွာမြို့မှ ဂျွန်ဖောက်စ်ကတော့ ထိခိုက်ဒဏ်ရာတွေနဲ့ အရေးပေါ်ကုသမှု လုပ်ဆောင်နေရတာပါ။

လက်ရှိမှာတော့ ကိုစိန်ဝင်းကို တရားရုံး ၂ ခုကနေ အသက်သေစေလောက်တဲ့ လက်နက်ကိုင်ဆောင်မှု အပါအဝင် စွဲချက်တွေနဲ့ ဆက်လက်စုံစမ်းမှုတွေ လုပ်ဆောင်နေတယ်လို့ သတင်းမှာ ဖော်ပြပါတယ်။

Source: DVB TV News