သမိုင်းပညာရှင်များက တိုင်းရင်းသားမျိုးနွယ်စုများတွင် ရိုဟင်ဂျာ မပါ ဝင်ကြောင်း မြန်မာ့သမိုင်းဖြစ်ရပ်မှန်များကို ရေးသားပြုစု ထုတ်ဝေဖြန့်ချိသွားမည်

၁။ သာသနာရေးနှင့်ယဉ်ကျေးမှုဝန်ကြီးဌာန၊ ပြည်ထောင်စုဝန်ကြီး သူရ ဦးအောင်ကိုသည် ၁၀-၁၂-၂၀၁၆ ရက်နေ့၊ ၀၉ ၀၀ ချိန်တွင် အမျိုးသား စာကြည့်တိုက်(ရန်ကုန်)၊ မြန်မာ့သမိုင်းအဖွဲ့ အစည်းအဝေးခန်းမ၌ သမိုင်း ပညာရှင်များပါဝင်သော မြန်မာ့သမိုင်းဖြစ်ရပ်မှန်များ ရေးသားပြုစုရေး အဖွဲ့နှင့် ညှိနှိုင်းအစည်းအဝေး ကျင်းပပြုလုပ်ခဲ့ပါသည်။

၂။ အဆိုပါအစည်းအဝေး၌ ပြည်ထောင်စုဝန်ကြီးက အမှာစကားပြောကြား ရာတွင် သမိုင်း ဖြစ်ရပ်မှန်များကို ဖုံးကွယ်ချန်လှပ်ထားခြင်း မရှိဘဲ ပကတိ အခြေအနေမှန်အတိုင်း ရေးသား စီစဉ် ဆောင်ရွက်ထားရှိမှုကို လူမှုကွန်ရက် အင်တာနက်စာမျက်နှာတွင် အများပြည်သူသို့ အသိပေးဖော်ပြ ခဲ့ရာ ထောက်ခံ သူ ကိုးဆယ်ရာခိုင်နှုန်းကျော် ရှိကြောင်းနှင့် အဆိုပါကိစ္စအား နိုင်ငံတော် သမ္မတနှင့် နိုင်ငံတော်၏အတိုင်ပင်ခံပုဂ္ဂိုလ်တို့ထံ တင်ပြခဲ့ပြီးဖြစ်ပါသည်။

၃။ ရှေးမြန်မာ့သမိုင်းရာဇဝင်များတွင် လည်းကောင်း၊ ကိုလိုနီခေတ်တွင် လည်းကောင်း၊ တိုင်းရင်းသား မျိုးနွယ်စု ၁၃၅ မျိုးတွင်လည်းကောင်း ရိုဟင်ဂျာဆိုသည့် စကားလုံးနှင့် အသုံးအနှုန်းများ ရေးသား ဖော်ပြမှု မရှိကြောင်း လေ့လာတွေ့ရှိရပါသည်။

၄။ မြန်မာနိုင်ငံ ပါလီမန်ဒီမိုကရေစီခေတ်၌ မောင်တောနှင့် ဘူးသီးတောင် မဲဆန္ဒနယ်များ၏ တိုင်းပြည်ပြု လွှတ်တော်အမတ် ဘင်္ဂလီ လူမျိုး အဗ္ဗဒူဂဖား သည် သင်္ဘောပျက်ပုံပြင်ကို လုပ်ကြံ ဖန်တီး၍ ရိုဟင်ဂျာ စကားလုံးနှင့် အသုံးအနှုန်းကို ထည့်သွင်းဖော်ပြထားသည့် အစီရင်ခံ စာအား ပြည်ထဲရေး ဝန်ကြီးနှင့် အတွင်းဝန်ထံ ၂၀-၁၁-၁၉၄၈ ရက်နေ့တွင် ပေးပို့ခဲ့ရာမှ ရိုဟင်ဂျာ စကားလုံးနှင့် အသုံးအနှုန်း စတင်ပေါ်ပေါက်ခဲ့ခြင်းဖြစ်ပါသည်။

၅။ လက်ရှိဖြစ်ပွားလျက်ရှိသည့် ရခိုင်ပြည်နယ်အရေးကိစ္စနှင့်စပ်လျဉ်း၍ ရခိုင်ပြည်နယ်ဆိုင်ရာ အကြံပေးကော်မရှင်ဥက္ကဋ္ဌ ကုလသမဂ္ဂ အထွေထွေ အတွင်းရေးမှူးချုပ်ဟောင်း မစ္စတာကိုဖီအာနန်နှင့် အဖွဲ့ဝင်များသည် ရခိုင်ပြည်နယ်သို့ စုံစမ်းစစ်ဆေးရန် သွားရောက်စဉ် ၆-၁၂-၂၀၁၆ ရက်နေ့တွင် သတင်းထောက်များနှင့် တွေ့ဆုံရာ၌ ၎င်းက ရခိုင်ပြည်နယ် အရေးကိစ္စနှင့် စပ်လျဉ်းပြီး “အကြမ်းဖက် ဆိုတာ မရှိဘူး၊ လူမျိုးတုန်း သတ်ဖြတ်မှုဆိုတာ မရှိဘူး၊ ရိုဟင်ဂျာဆိုတာလည်း လုံးဝ မရှိဘူး”ဟု အတိအလင်း ရှင်းလင်းဖြေကြားခဲ့ပါသည်။

၆။ ထို့အပြင် ဘင်္ဂလားဒေ့ရှ်ဝန်ကြီးချုပ် ရှိတ်ဟာဆီနား က “ရခိုင်အရေး ကိစ္စဖြစ်ပွားမှုမှာ မြန်မာ နယ်ခြားစောင့်တပ်ဖွဲ့ ၉ ဦးကို အကြမ်းဖက်သမား များက ဝင်ရောက်သတ်ဖြတ်ခဲ့ရာမှ ယခုကဲ့သို့ ပြဿနာများ ဖြစ်ပွား ခဲ့ရခြင်းဖြစ်ကြောင်း၊ မြန်မာ့နယ်ခြားစောင့်တပ်၏ နယ်မြေရှင်းလင်းမှုကြောင့် ထွက်ပြေး လာသော ဘင်္ဂါလီအကြမ်းဖက် သမားအချို့ကို မြန်မာအစိုးရထံ လွှဲပြောင်းပေးအပ်ခဲ့ကြောင်း၊ အဆိုပါ ဘင်္ဂါလီအကြမ်းဖက်သမားများကို ဘင်္ဂလားဒေ့ရှ်နိုင်ငံ၌ ခိုလှုံခွင့်ပြုမည် မဟုတ်ကြောင်း” ဒက္ကားမြို့ရှိ ဝန်ကြီးချုပ်ရုံး ၌ ၆-၁၂-၂၀၁၆ ရက်နေ့တွင် ပြုလုပ်သော သတင်းစာရှင်းလင်းပွဲ ၌ ပြောကြား ခဲ့ပါသည်။

၇။ မြန်မာနိုင်ငံ၌ ရှေးယခင်ကတည်းက ရိုဟင်ဂျာလူမျိုး မရှိခဲ့သော် လည်း ပြည်တွင်း/ပြည်ပရှိ မလိုလားသူများက ရိုဟင်ဂျာလူမျိုးရှိကြောင်း လှုံ့ဆော်ရေးသား၍ မြန်မာနိုင်ငံ၏ နိုင်ငံရေးပုံရိပ်နှင့် ဂုဏ်သိက္ခာ ကျဆင်းစေရန်နှင့် မတည်မငြိမ်ဖြစ်​စေရန်ရည်ရွယ်ကာ မြန်မာနိုင်ငံ၏အရေးကို ဝင်ရောက် စွက်ဖက် ခြယ်လှယ်ပြီး လုပ်ကြံဖန်တီး ပြောဆိုရေးသား ထုတ်လွှင့်ဖြန်ချိနေသည်မှာ ကာလအတန် ကြာခဲ့ပြီ ဖြစ်ပါသည်။

၈။ ထိုသို့ မြန်မာ့သမိုင်း၌ တိုင်းရင်းသားလူမျိုးနှင့် မျိုးနွယ်စုများတွင် ရိုဟင်ဂျာ စကားလုံးနှင့် အသုံးအနှုန်းကို မည်သည့်အချိန်ကာလကမျှ မရှိခဲ့သည့် ဖြစ် ရပ်မှန် များကို သမိုင်းပညာရှင်များက ရှေးမြန်မာ့သမိုင်း ရာဇဝင်၊ ခေတ် အဆက်ဆက် ရေးသားပြုစုခဲ့သည့် သမိုင်း မှတ်တမ်းစာအုပ်များ၊ အခြား အထောက်အထား အကိုးအကားများဖြင့် ပြည့်ပြည့်စုံစုံ ရေးသားပြုစု၍ နိုင်ငံတော်သမ္မတနှင့် နိုင်ငံတော်၏အတိုင်ပင်ခံပုဂ္ဂိုလ်တို့ထံ တင်ပြ အတည်ပြုချက်ရယူသွားမည် ဖြစ်ပါသည်။

၉။ အဆိုပါ မြန်မာ့သမိုင်းဖြစ်ရပ်မှန်စာအုပ်အား ပြည်တွင်း/ပြည်ပ စာဖတ် ပရိတ်သတ်များနှင့် အများပြည်သူ လေ့လာသိရှိနိုင်ရန် သမိုင်းပညာရှင်များက အထောက်အထားများ ဝေဆာစွာဖြင့် ရေးသားပြုစု၍ နိုင်ငံတော်အကြီးအကဲ များ၏ အတည်ပြု ခွင့်ပြုချက်နှင့်အညီ သပ်ရပ်ခန့်ညားစွာ ထုတ်ဝေဖြန့်ချိသွား မည်ဖြစ်ကြောင်း ရှင်းလင်းဖော်ပြအပ်ပါသည်။

သာသနာရေးနှင့်ယဉ်ကျေးမှုဝန်ကြီးဌာန

၁၂.၁၂.၂၀၁၆

Ref; Ministry of Religious Affairs and Culture