ဖုန်းအားသွင်းရာမှ မီီးလောင်ပြီး မိသားစုဝင်သုံးဦးစလုံး မီးလောင်ကာသေဆုံး

ဖုန်းအားသွင်းရာမှ မီီးလောင်ပြီး မိသားစုဝင်သုံးဦးစလုံး မီးလောင်ကာသေဆုံး

နမ့်စန်မြို့မှာ ညအချိန်ဆိုလာပြားကနေတစ်ဆင့် ဖုန်းအားသွင်းရာက မီးလောင်မှုဖြစ်ပွားပြီး နေအိမ်အတွင်းမှာ အိပ်ပျော်နေတဲ့ မိသားစုဝင်သုံးဦးစလုံးမီးလောင်ကာ သေဆုံးခဲ့တယ်လို့ နမ့်စန်ရဲစခန်းကသိရပါတယ်။

အဆိုပါဖြစ်ရပ်မှာ ဒီဇင်ဘာလ၁၃ရက်နေ့ ည၁၁နာရီ ကျော်အချိန်မှာ ဖြစ်ပွားခဲ့တာဖြစ်ပြီး နေအိမ်အတွင်းအိပ်ပျော်နေတဲ့ အသက်၅၂နှစ်အရွယ်အမျိုးသမီးကြီးနဲ့အသက် ၁၃နှစ်အရွယ် သမီးဖြစ်သူ၊အသက် ၁၂နှစ်အရွယ်တူမဖြစ်သူသေဆုံးခဲ့ရတယ်လို့သိရပါတယ်။

နမ့်စန်မြို့မရဲစခန်းမှူးဦးတင်မောင်ဆွေက”အရင်တုန်းကတော့မီးရိုးရိုးလောင်တာပဲဖြစ်ဖူးတယ်။ သည်လိုမီးလောင်ပြီးသေတာမျိုးမဖြစ်ဖူးဘူး။ဘေးအိမ်တွေကလည်းအမျိုးအိမ်တွေပဲ။သူတို့တစ်အိမ်ထဲပါသွားတာပါ”လို့ပြောပါတယ်။

မီးလောင်မူဖြစ်ပွားခဲ့တဲ့ နေအိမ်ဟာ တစ်ထပ်ပျဉ်ထောင်အိမ်အမျိုးအစားဖြစ်ပြီး ဘေးအိမ်တွေကတော့ တိုက်ခံအိမ်တွေဖြစ်တာကြောင့် မီးမကူးခဲ့တာဖြစ်တယ်လို့ဆိုပါတယ်။

မီးလောင်မှုကြောင့်နေအိမ်အပြင် နေအိမ်ဝိုင်းအတွင်းက ထော်လာဂျီတစ်စီး၊ဆိုင်ကယ်တစ်စီးပါ မီးလောင်ကျွမ်းခဲ့ပြီး ပုဒ်မ၂၈၅/၃၀၄ဃနဲ့အမှု ဖွင့်ထားတယ်လို့သိရပါတယ်။

အိမ်ရှင်အမျိုးသမီးရဲ့သမီးနှစ်ဦးဟာထိုင်းနိုင်ငံမှာသွားရောက်အလုပ်လုပ်ကိုင်နေကြတာဖြစ်ပြီး နာရေးကိုမြို့ခံတွေကကူညီပေးနေကြရတယ်လို့သိရပါတယ်။

နာရေးမှာကူညီပေးနေတဲ့နမ့်စန်အန်အယ်ဒီဥက္ကဌဦးဇော်နိုင်က”သေသွားတဲ့အထဲပါသွားတဲ့သူ့တူမလေးဆိုတာ သည်အိမ်မှာအမြဲတမ်းနေတာမဟုတ်ဘူး လာအပ်သွားတာ နေတာဘယ်လောက်မှမရှိသေးဘူး”လို့ပြောပါတယ်။

Source: Kumudra

Go Goe