ကျွတ်ကျွတ်အိတ်ဖြင့် ထုတ်ထားသည့် အမျိုးသားအလောင်းတစ်လောင်းတွေ့ရှိ

မန္တလေးမြို့ ၊ မဟာအောင်မြေမြို့နယ်၊ စိန်ပန်းရပ်ကွက် တာရိန်လမ်း ၊ သမ္မတကိတ်မုန့်တိုက်လမ်းကြားရှိ နေအိမ်တစ်ခုတွင် တိပ်ဖြင့်ပတ်၍ ကျွတ်ကျွတ်အိတ်ဖြင့် ထုတ်ထားသည့် အမျိုးသားအလောင်းတစ်လောင်းကိုတွေ့ရှိခဲ့ကြောင်း သတင်းရရှိသည်။

စိန်ပန်းရပ်ကွက်ရှိ နေအိမ်တစ်ခုမှ အခန်းတစ်ခန်းကို အသက် ၁၈နှစ်အရွယ်ရှိ အမျိုးသားနှစ်ဦးက လွန်ခဲ့တဲ့ ၃လမှစတင်၍ ငှားရမ်းနေထိုင်ခဲ့ပြီးနောက် တစ်ဦးသေဆုံးနေသည်ကို ယနေ့ ဖေဖော်ဝါရီလ ၂၄ရက်မွန်းလွဲ၁နာရီက တွေ့ရှိခဲ့ကြောင်း အဆိုပါအိမ်တွင် အိမ်ငှားနေထိုင်သည့် ကိုမောင်အေးကပြောသည်။

ကျွန်တော်လည်းအိမ်ငှားပါပဲ ။ သူတို့နှစ်ယောက်က အိမ်ထဲကိုဝင်လိုက်ထွက်လိုက်ပါပဲ။ သေတဲ့ကောင်လေးရဲ့ ဦးလေးတွေကနေ လာရှာရင်း သေတယ်ဆိုတာသိရတယ်။၄ရက်လောက်တော့ရှိလောက်ပြီ။ တိပ်နဲ့ပတ်ထားတော့ အနံ့မထွက်ဘူး။ သူနဲ့အတူနေတဲ့ ကောင်လေးကိုတော့ ရဲစခန်းကို ခေါ်သွားတယ် ဟု မျက်မြင်တွေ့ရှိခဲ့သူ ကိုမောင်အေးကပြောသည်။

အဆိုပါ အမျိုးသားနှစ်ဦးသည် မြစ်ကြီးနားမြို့မှလာရောက်၍ ရတနာပုံတက္ကသိုလ်တက်ရောက်နေခြင်း ဖြစ်ကြောင်း သိရသည်။

လောလောဆယ်မှာတော့ စစ်ဆေးနေတုန်းပါပဲ အခုစစ်ဆေးနေတဲ့ကောင်လေးက သံသယရှိအဆင့်ပဲရှိပါသေးတယ်။ ဟု မဟာအောင်မြေမြို့နယ်ရဲတပ်ဖွဲ့မှူး ရဲမှူးတင်ထွန်းအောင်ကပြောသည်။

ဓာတ်ပုံ-ဖြိုးဖြိုးဇော်

Pyae Phyo Kyaw