လူနေအိမ်ပျက်စီးမှုများပြားခဲ့တဲ့ ဇလွန်မြို့နယ်အတွင်း မိုးရွာသွန်းမှု

လတ်တလောအဖြစ်များနေတဲ့ ပြည်တွင်း မိုးရွာသွန်းမှုပြင်းထန်ခြင်း၊ မိုးသက်လေပြင်းတိုက်ခတ်ခြင်းတွေကတော့ မကြာခဏဆိုသလို ကြားသိနေရဆဲဖြစ်ပါတယ်။ မိုးရွာသွန်းမှုပြင်းထန်ခဲ့မှုတွေကြောင့် ဒေသများစွာမှာ နေအိမ် အဆောက်အဦးများပျက်စီးမှုတွေနဲ့အတူ သစ်ပင်ပြိုလဲမှု အမိုးလန်မှုတွေကတော့ မရေမတွက်နိုင်အောင်ရှိခဲ့တာတွေ့ရပါတယ်။  

မေလ ၆ရက်နေ့ မနေ့ကလည်း ဇလွန်မြို့နယ်တွင် မိုးရွာသွန်းပြီး လေပြင်းတိုက်ခတ်မှုကြောင့် လူနေအိမ်များပျက်စီးခဲ့ကြောင်း သိရပါတယ်။ အဆိုပါဖြစ်စဉ်ကတော့ ဧရာဝတီတိုင်း ဒေသကြီး၊ ဇလွန်မြို့နယ်တောင်ပို့တစ်ရာ၊ဖားလက်ခို ၊ ကူးတို့ဆိပ် နှင့် နန်းတော်ကျွန်းကျေးရွာအုပ်စုတို့တွင် မေလ ၆ ရက်နေ့ ညနေ ၆ နာရီ အချိန်တွင် မိုးရွာသွန်းပြီး လေပြင်းတိုက်ခတ်မှုကြောင့် လူနေအိမ် လေးလုံး အမိုးလန်၍ ငါးလုံး ပြိုလဲပျက်စီးခဲ့ကြောင်း သိရပါတယ်။  

အဆိုပါ မိုးရွာသွန်းမှုကြောင့် ပစ္စည်းဆုံးရှုံးမှုများစွာရှိခဲ့ပေမယ့် လူနှင့်တိရစ္ဆာန်များထိခိုက်သေဆုံးမှုမရှိကြောင်းသိရပါတယ်။ လက်တလောဖြစ်ပွားနေတဲ့ ပြည်တွင်း ဆိုးဆိုးရွားရွားမိုးရွာသွန်းမှုတွေထဲက ဇလွန်မြို့အတွင်းပုံရိပ်အချို့ကို ချစ်ပရိသတ်တွေအတွက်မျှဝေပေးလိုက်ပါတယ်။

SOURCE - THE MIRROR DAILY