ဓာတ်လှေကားကြီးတစ်ခုလုံးလှုပ်ခါပြီး မတော်တဆဖြစ်နေချိန် တစ်ယောက်တည်းပိတ်မိခဲ့တဲ့ ဝင့်ယမုံနိုင်

မင်းသမီးချောလေး ဝင့်ယမုံနိုင်ကတော့ အပြင်သွားခါနီး ဓာတ်လှေကားထဲဝင်လိုက်ချိန်မှာ မတော်တဆမှုတစ်ခု ဖြစ်ခဲ့တယ်လို့ သိရပါတယ်။ ဝင့်ယမုံနိုင်က သူမရဲ့ My Story မှာဖြစ်ပျက်ခဲ့သမျှ အကြောင်းအရာအကုန်လုံးကို အသေးစိတ်ကအစ သေချာပြောပြခဲ့တာ ဖြစ်ပါတယ်။ ဓာတ်လှေကားကြီးတစ်ခုကို တုန်ခါပြီး အပေါ်တက်လိုက် အောက်ဆင်းလိုက်ဖြစ်နေချိန် ဝင့်ယမုံနိုင်က အထဲမှာ တစ်ယောက်တည်း ပိတ်မိနေခဲ့တာပဲ ဖြစ်ပါတယ်။

သူမကြုံတွေ့ခဲ့ရတဲ့ အဖြစ်အပျက်ကိုတော့ ဝင့်ယမုံနိုင်က " အပြင်သွားဖို့ ဓာတ်လှေကားစီးတယ် B1 နှိပ်အပြီး တံခါးလည်းအပိတ် ဂျိန်းဂျိန်းဂျိန်း အသံကြီးမြည်ပြီး ဓာတ်လှေကားကြီးခါပြီး အောက်ကိုအရှိန်နဲ့ကျသွားတယ်။ အထဲက နံပါတ်တွေဘာတစ်ခုမှ မီးမလင်းတော့ဘူး။ ဓာတ်လှေကားမီးတော့ လင်းသေးတယ်။ အထဲမှာ ကိုယ်တစ်ယောက်တည်း ပြန်ထွက်ဖို့ခလုတ်နှိပ်တယ်။ တံခါးမပွင့်တော့ဘူး ခလုတ်တွေလည်း မီးမလင်းတော့ဘူး ဘာတစ်ခုမှ အလုပ်မလုပ်တော့ဘူး။ ဓာတ်လှေကားတစ်ခုလုံး ခါနေတယ်။ ဂျီဂျီဂျီ အသံတွေမြည်နေတယ် တံခါးပွင့်မယ့် အသံထွက်နေပေမယ့် မပွင့်ဘူး ။ "

"ခဏနေ ဂျိန်းဂျိန်းဂျိန်း အသံကြီးမြည်ပြီး တစ်ခုလုံးခါပြီး အပေါ်ကို အရှိန်နဲ့ပြန်တက်သွားတယ်။ လက်ကိုင်ကိုင်ပြီး အထဲမှာ ယမ်းနေတဲ့ ကိုယ့်ကိုကိုယ် မနည်းထိန်းထားရတယ်။ အသံတွေမြည်ပြီး အရှိန်နဲ့ အပေါ်ပြန်တက်လိုက် အောက်ဆင်းလိုက်ဖြစ်နေတာ အရေးပေါ်ဆက်သွယ်ရမယ့် နံပါတ်ကိုခေါ်တယ် ဖုန်းမအားဘူး။ အထဲမှာ လှုပ်တောင်မလှုပ်ရဲဘူး တော်တော်ကြာနေတော့မှ တံခါးက ဖြည်းဖြည်းချင်း လူတစ်ယောက်စာလောက်ပဲ ပွင့်လာတယ်။ အမြန်ပြေးထွက်ပြီး ကြည့်လိုက်တော့ လာခဲ့တဲ့အလွှာကို ပြန်ရောက်နေတယ်။ လှေကားနဲ့ပြန်ဆင်းတော့ ၂ လွှာအရောက် ဓာတ်လှေကားထဲက ဝုန်းခနဲ အသံအကျယ်ကြီးမြည်ပြီး တစ်ခုခုတိုက်မိသလို ပေါက်ကွဲသလိုလို အသံကျယ်ကြီး ထွက်လာတယ်။ ဓာတ်လှေကားတော့ ဘာဖြစ်သွားပြီလဲ မသိဘူး။ လူတစ်ကိုယ်စာလေးသာ တံခါးမပွင့်ခဲ့ရင် အခုချိန် ဓာတ်လှေကားထဲ ဘာဖြစ်နေမလဲမသိဘူး ဘုရားဘုရား တော်သေးတာပေါ့ ဓာတ်လှေကားထဲက ပြန်ထွက်လို့ရလို့ " ဆိုပြီး ပြောပြထားတာ ဖြစ်ပါတယ်။

Source:Wint Yamone Naing;