အရှိန်မထိန်းနိုင်ဘဲ တိုက်မှုဖြစ်ပွားခဲ့တဲ့ ယာဉ်တိုက်မှုတစ်ခု

မကြာခဏဖြစ်ပေါ်နေတဲ့ ယာဉ်တိုက်မှုတွေထဲမှာ နေပြည်တော် - ရန်ကုန် အမြန်လမ်းမကြီးပေါ်က သတင်းတွေကတော့ အများဆုံးဖြစ်တယ်ဆိုတာအားလုံးလည်း သိပြီးဖြစ်မယ်ထင်ပါတယ်။ ယာဉ်တိုက်မှုတွေထဲမှာ ဆိုးရွားတဲ့ယာဉ်တိုက်မှုများစွာရဲ့ အဓိကဖြစ်စဉ်တွေကတော့ စည်းကမ်းမဲ့မောင်းနှင်မှုတွေနဲ့ သဘာဝဘေးဒုက္ခတွေကြောင့် အဖြစ်များလေ့ရှိတာတွေ့ရပါတယ်။ အဆိုပါ ယာဉ်တိုက်မှုတွေကြောင့် သေကြေမှုတွေနဲ့အတူ ဆုံးရှုံးမှုများစွာကတော့ မကြာခဏဆိုသလိုဖြစ်ပေါ်လျှက်ရှိတာတွေ့ရပါတယ်။  

ရန်ကုန်မြောက်ပိုင်းခရိုင် လှည်းကူးမြို့နယ် အမှတ်(၃)လမ်းဆုံအမြန်လမ်းမကြီး နေပြည်တော်-ရန်ကုန် အမြန်လမ်းမိုင်တိုင်အမှတ်(၁၆/ဝ) အနီးတွင် ဇူလိုင်(၈)ရက် ညနေ(၃)နာရီ(၄၅)မိနစ်အချိန်ခန့်က ယာဉ်အားအရှိန်မထိန်းနိုင်ဘဲ လမ်းလယ်ကျွန်း ကာရံထားသောဂတ်ဝေးတန်း အား ဝင်တိုက်မိပြီး တိမ်းမှောက်ခဲ့ကြောင်း သိရပါတယ်။ ဖြစ်စဉ်မှာ နေပြည်တော်-ရန်ကုန်အမြန်လမ်းမိုင်တိုင်အမှတ်(၁၆/ဝ)အနီးတွင် ယာဉ်မောင်းစောထူးဘွဲ့ဖော(၄၁)နှစ် ဦးစောရွှေထူးဖော မြို့မ(၁) ရပ်ကွက် ညောင်လေးပင်မြို့နေသူ မောင်းနှင်လာပြီး ယာဉ်နောက်ခန်းတွင် မချို(၃၄)နှစ် ၊ မနော်သမီ(၂၅)နှစ် ၊ ကိုကီကူ(၂၆)နှစ် တောင်သလဲမြောင်ကျေးရွာ ဒိုက်ဦးမြို့နယ်နေသူတို့ လိုက်ပါလာသော BGO 3Q/-----Nissan အဖြူရောင်ယာဉ်သည် အရှိန်မထိန်းနိုင်ဘဲ လမ်းလယ်ကျွန်းအား ကာရံထားသော ဂတ်ဝေးတန်းအားဝင်ရောက်တိုက်မိပြီး တိမ်းမှောက်ခဲ့ကြောင်း ကနဦးသတင်းများအရ သိရပါတယ်။  

အဆိုပါဖြစ်ယာဉ်တိုက်မှုဖြစ်စဉ်ကြောင့် အမှတ်(၃)လမ်းဆုံ အမြန်လမ်းမကြီး စခန်းမှူးရဲအုပ်သန့်ဇင်နှင့်အဖွဲ့၊ အမြန်လမ်းမီးသတ်စခန်းမှလက်ထောက်ဦးစီးမှူး ၊ အမြန်လမ်း (ဆလရ ပြင်/ထိန်း)အဖွဲ့တို့သည် အဆိုပါနေရာသို့သွားရောက်စစ်ဆေးရာ ယာဉ်ပေါ်ပါသူ မချို၊ မနော်သမီ၊ ကိုကီကူတို့သည် ဒဏ်ရာများရရှိသဖြင့် လှည်းကူးဆေးရုံသို့တင်ပို့ခဲ့ပါတယ်။ ဖြစ်စဉ်နှင့်ပတ်သက်၍ ယာဉ်အားမဆင်မခြင်မောင်းနှင်မှုကြောင့် ယာဉ်မောင်း စောထူးဘွဲ့ဖောအား အမြန်လမ်းမကြီးရဲစခန်းက အမှုဖွင့် အရေးယူဆောင်ရွက်ထားကြောင်း သိရပါတယ်။

SOURCE - THE MIRROR DAILY