ချန်ပီယံအသင်းသစ် ထွက်ပေါ်ခဲ့သည့် မွန်ပြည်နယ်အဆင့် MPT အသက် ၁၄ နှစ်အောက် ဘောလုံးပြိုင်ပွဲ၏ နောက်ဆုံးဗိုလ်လုပွဲစဉ်နှင့် ဆုချီးမြှင့်ပွဲ အခမ်းအနားကို ယနေ့ညနေပိုင်းက မော်လမြိုင်မြို့ရှိ ဆောက်သမ်းမြန်မာအသင်းအိမ်ကွင်း မော်လမြိုင်ကွင်း၌ ကျင်းပပြုလုပ်ခဲ့ပါတယ်။ဗိုလ်လုပွဲစဉ်အဖြစ် သထုံညွန့်ပေါင်းအသင်းနှင့် ကျိုက်မရောအသင်းတို့ ယှဉ်ပြိုင်ကစားခဲ့ရာ ကျိုက်မရောလူငယ်အသင်းက နှစ်ဂိုး၊ ဂိုးမရှိဖြင့် အနိုင်ရဗိုလ်စွဲခဲ့ပါတယ်။
MPT အသက် ၁၄ နှစ်အောက်ဘောလုံးပြိုင်ပွဲတွင် ပထမဆုကို ကျိုက်မရောအသင်း၊ ဒုတိယဆုကို သထုံညွန့်ပေါင်းအသင်း၊ တတိယဆုကို ကျိုက်ထိုလူငယ်အသင်းတို့ ရရှိခဲ့ပြီး ပထမဆုကို ဆုဖလားနှင့် အတူ ဆုကြေးငွေကျပ် ၁၀ သိန်း၊ ဒုတိယဆုကို ဆုတံဆိပ်နှင့်အတူ ဆုကြေးငွေကျပ် ၅ သိန်း၊ တတိယဆုကို ဆုတံဆိပ်အပါအဝင် ဆုကြေးငွေ ၃ သိန်းကျပ် ပေးအပ်ချီးမြှင့်ခဲ့သည့်အပြင် အသန့်ရှင်းဆုံးအသင်းဆုနှင့် ပွဲစဉ်တစ်လျှောက် နေရာအလိုက်အကောင်းဆုံးဆုများကိုပါ ရွေးချယ်ချီးမြှင့်ခဲ့ခြင်းဖြစ်ပါတယ်။
ဒုတိယအကြိမ် MPT အသက် ၁၄ နှစ်အောက်ဘောလုံးပြိုင်ပွဲတွင် ချန်ပီယံအသင်းသစ် ထွက်ပေါ်ခဲ့ခြင်းဖြစ်ပြီး ယမန်နှစ်ချန်ပီယံ မော်လမြိုင်လူငယ်အသင်းမှာ ယခုနှစ်တွင် အုပ်စုအဆင့်ဖြင့်သာ ကျေနပ်ခဲ့ရပါတယ်။ ၂၀၁၉ ပြိုင်ပွဲများအဖြစ် မန္တလေး၊ ရွှေဘို(စစ်ကိုင်း)၊ ရန်ကုန်၊ မကွေး၊ တောင်ကြီး၊ ပဲခူး၊ ဘားအံ၊ မော်လမြိုင်တို့တွင် ကျင်းပပြီးစီးခဲ့ပြီဖြစ်ပါတယ်။ဆက်လက်၍ ရခိုင်ပြည်နယ်အဆင့်(စစ်တွေ) နှင့် ဧရာဝတီတိုင်းဒေသကြီးအဆင့်(ပုသိမ်)တို့တွင် ဆက်လက်ကျင်းပသွားမည်ဖြစ်ပါတယ်။
source:myanmar national league ' s facebook
"Myanmarload's content is copyrighted and only allowed to appear on Myanmarload website. Please respect our copyrights"
Myanmarload မှရေးသားသောသတင်းများသည် Myanmarload၏ မူပိုင်သတင်းများဖြစ်ပြီး Myanmarload Website ထဲတွင်သာ ဖတ်ရှုနိုင်ပါသည်။ ကျွန်ုပ်တို့၏ မူပိုင်ခွင့်ကိုလေးစားသောအားဖြင့် တစ်ဆင့်ကူးယူဖော်ပြခြင်းမပြုရန် မေတ္တာရပ်ခံအပ်ပါသည်။