ဒီကနေ့ မတ်လ ၇ ရက်နေ့မှာတော့ ကျောက်မြောင်းရပ်ကွက် အတွင်းမှာ လွတ်လပ်စွာဆန္ဒထုတ်ဖော်တဲ့ သပိတ်စစ်ကြောင်း လှည့်လည်ခဲ့ပါတယ်။
ဒီသပိတ်စစ်ကြောင်းအတွင်းမှာတော့ ဗမာနိုင်ငံလုံးဆိုင်ရာ ကျောင်းသားသမဂ္ဂ အဖွဲ့ဝင်များ၊ ရန်ကုန်တက္ကသိုလ်က ကျောင်းသား သမဂ္ဂအဖွဲ့ဝင်များ၊ စစ်အာဏာရှင်စနစ်ကို ဆန့်ကျင်တဲ့ သံဃာတော်များ၊ ဗမာနိုင်ငံလုံးဆိုင်ရာ အလုပ်သမား သမဂ္ဂ အဖွဲ့ဝင်များ ၊ လူ့ဘောင်သစ်ပါတီဝင်တွေနဲ့ ဗမာနိုင်ငံလုံးဆိုင်ရာ လူငယ်ကဗျာဆရာများ သမဂ္ဂက အဖွဲ့ဝင်တွေ ပါဝင်ပါတယ်။
ဒီသပိတ်စစ်ကြောင်းရဲ့ တပ်ဦးအလံရှေ့မှာတော့ လူငယ်တွေက ဒိုင်းတွေနဲ့ ကာဗာယူပေးပြီး ချီတက်ခဲ့တာကို တွေ့ရပါတယ်။
ဒီသပိတ်စစ်ကြောင်းဟာ မြန်မာစံတော်ချိန် နံနက် ၁၀ နာရီဝန်းကျင်လောက်မှာ ကျောက်မြောင်းရပ်ကွက် ကျားကွက်သစ်လမ်းကနေ စတင်ထွက်ခွာခဲ့တာပဲ ဖြစ်ပြီး သပိတ်စစ်ကြောင်း လှည့်လည်ရာ လမ်းတစ်လျှောက်မှာ ရပ်ကွက်နေပြည်သူတွေကလည်း တခဲနက် ထောက်ခံအားပေးခဲ့တာကို တွေ့ရပါတယ်။
ကျောက်မြောင်းရပ်ကွက် သြဘာလမ်းထိပ်မှာလည်း ဆန္ဒထုတ်ဖော်တဲ့ ပြည်သူတွေများစွာရှိနေတာကို တွေ့ရပါတယ်။
ဒါ့အပြင် ကျားကွက်သစ်လမ်း တစ်လျှောက်မှာလည်း အထိုင်သပိတ်ပြုနေတဲ့ ရပ်ကွက်သူ ရပ်ကွက်သားတွေတော့ များစွာရှိနေတာကို တွေ့ရပါတယ်။