ပြီးခဲ့တဲ့ မတ်လ (၁၄) ရက်နေ့နဲ့ (၁၅) ရက်နေ့မှာတော့ ရန်ကုန်မြို့ရှိ နေရာတော်တော်များများမှာ ကျဆုံးသွားတဲ့ ပြည်သူတွေ အများအပြားရှိခဲ့တာ ဖြစ်ပါတယ် ။ အသက်ပေးသွားခဲ့ရတဲ့ သူရဲကောင်းတွေထဲက တစ်ယောက်ဖြစ်တဲ့ မောင်ခန့်ငြားဟိန်းကတော့ အသက် (၁၇) နှစ်သာရှိသေးတဲ့ လူငယ်တစ်ဦးပဲ ဖြစ်ပါတယ် ။ ဆေးတက္ကသိုလ် (၁) Foundation Year မှာ တက်ရောက်ပညာသင်ကြားနေတဲ့ ဆေးကျောင်းသားတစ်ဦးလည်းဖြစ်တဲ့ မောင်ခန့်ငြားဟိန်းက မတ်လ (၁၄)ရက်နေ့မှာပဲ ကြွေလွင့်ခဲ့ရတာ ဖြစ်ပါတယ် ။
တိုင်းပြည်ရဲ့အနာဂတ်ကြယ်ပွင့်ဖြစ်တဲ့ ဆရာဝန်လောင်းတစ်ယောက်ကို ဆုံးရှုံးလိုက်ရတာကြောင့် ပြည်သူတွေအနေနဲ့ အရမ်းကို စိတ်မကောင်းဖြစ်နေရတာပဲ ဖြစ်ပါတယ် ။ အခုလည်း ပြည်သူတစ်ယောက်က မောင်ခန့်ငြားဟိန်းရဲ့မိခင်နဲ့တွေ့ဆုံခဲ့ပြီး သူမပြောပြခဲ့တဲ့စကားတွေကို အားလုံးသိရအောင် ပြန်လည်မျှဝေပေးခဲ့တာ ဖြစ်ပါတယ် ။ မိခင်ဖြစ်သူရဲ့ပြောပြချက်အရ မောင်ခန့်ငြားဟိန်းက သူပါရဂူကြီးဖြစ်လာတဲ့အချိန်ကျရင် ဆင်းရဲချို့တဲ့သူတွေကို အလကားကုပေးမယ်လို့ ရည်မှန်းချက်ထားခဲ့သူ ဖြစ်ပါတယ် ။ စိတ်ထားအရမ်းကောင်းပြီး စာတော်တဲ့သားလိမ္မာလေးကို ဆုံးရှုံးလိုက်ရတဲ့ မိခင်ဖြစ်သူကတော့ သူမရဲ့သားနဲ့ပတ်သက်ပြီး ယူကျုံးမရဖြစ်နေရတာ ဖြစ်ပါတယ် ။
မောင်ခန့်ငြားဟိန်းရဲ့မိခင်က သားကို အရမ်းချစ်ရတဲ့အကြောင်းတွေ ပြောပြရင်းနဲ့ "အန်တီ့သားလေးကို အမြဲအမှတ်ရနေပေးပါနော်၊ သားလေးအတွက် အမှတ်တရဖြစ်စေမယ့်နေရာလေးတွေလည်း လုပ်ပေးပါနော်၊ အန်တီ့သားလေးကိုလွမ်းတိုင်း အဲ့နေရာလေးတွေသွားပြီး ဂုဏ်ယူချင်လို့ပါသားရယ်၊ အန်တီ့သား ဆရာဝန်လောင်းလေးကို အန်တီ ဂုဏ်ယူချင်လို့ပါ သားရယ်" ဆိုပြီး တောင်းဆိုခဲ့တာလည်း ဖြစ်ပါတယ်။ ဒါ့အပြင် အလှူငွေပေးတာတောင် လက်မခံဘဲ သူမတို့ထက်ပိုလိုတဲ့သူတွေကို သာပေးဖို့နဲ့ သူမရဲ့သားလေးကိုရည်စူးပြီး လှူဒါန်းပေးကြပါလို့ ပြောခဲ့ပါသေးတယ်။ သူရဲကောင်းသားလေးအတွက် ကြေကွဲခံစားနေရတဲ့ မိခင်တစ်ဦးရဲ့ရင်ဖွင့်စကားတွေကတော့ တကယ့်ကို ရင်ထဲအထိ လှုပ်ခတ်စေနိုင်တာ ဖြစ်ပါတယ် ။ ပရိသတ်တွေအတွက် မောင်ခန့်ငြားဟိန်းအကြောင်းကို ပြန်လည်ဖော်ပြရင်းနဲ့ ကျဆုံးသွားတဲ့ ပြည်သူတွေအားလုံး ကောင်းရာမွန်ရာရောက်ပါစေလို့ ဆုတောင်းပေးလိုက်ရပါတယ်။
Source & Photo Credit-Original Uploader & (Si Thu's FB Acc)