ခေတ္တတိမ်းရှောင်နေရပေမယ့်လည်း အရေးတော်ပုံအောင်ဖို့ လှုပ်ရှားမှုတွေ ဆက်လက်လုပ်ဆောင်သွားမယ့် သန္တာလှိုင်

မော်ဒယ်  သန္တာလှိုင်ကတော့  လမ်းပေါ်ထွက်ကာ  ပြည်သူတွေနဲ့အတူ  အမှန်တရားဘက်က ရပ်တည်နေတဲ့  အနုပညာရှင်တစ်ဦးပဲ  ဖြစ်ပါတယ်။ တတ်နိုင်တဲ့ အခန်းကဏ္ဍကနေ ပါဝင်ဆောင်ရွက်ပေးနေတာကြောင့်လည်း  အားလုံးရဲ့ ချီးကျူးခြင်းတွေကို  ရရှိထားတာပါ။  လက်ရှိအခြေအနေမှာ တိမ်းရှောင်နေရပေမယ့်လည်း  လူမှုကွန်ယက်ကနေတစ်ဆင့် speak out လုပ်ပေးနေသူ တစ်ယောက်ပါ။

မနေ့ညက ထွက်ပေါ်လာတဲ့ သတင်းကြောင့်  ပရိသတ်တွေနဲ့ ရင်းနှီးတဲ့ မိတ်ဆွေများက သန္တာလှိုင်ရဲ့ လုံခြုံရေးအတွက်  စိတ်ပူနေကြတာပါ။  မကြာသေးခင်  နာရီပိုင်းလောက်က  သူမရဲ့ လူမှုကွန်ယက်စာမျက်နှာတွင် ခေတ္တတိမ်းရှောင်နေရပေမယ့်လည်း အရေးတော်ပုံအောင်ဖို့ လှုပ်ရှားမှုတွေ ဆက်လက်လုပ်ဆောင်သွားမယ့် အကြောင်းနဲ့စိတ်ပူပေးကြတဲ့အတွက်  ကျေးဇူးတင်ကြောင်း ရေးသားထားတာပဲ  ဖြစ်ပါတယ်။ 

" မနေ့ညက စိုးရိမ်ပြီး လာပြောကြတဲ့သူတွေ၊ ဆုတောင်းစကား လာပြောပေးတဲ့သူတွေ အားလုံးကို ကျေးဇူးတင်ပါတယ်။ ဒီအချိန်ကာလမှာ အာဏာရှင်တွေနဲ့ ဘယ်နေရာမှ၊ ဘယ်သူမှ အသက်အိုးအိမ် လုံခြုံမှုမရှိလို့ ဝရမ်းထုတ်ခံရတဲ့ သူတွေရယ်လို့ထူးပြီး အန္တရာယ်ရှိတာ မဟုတ်ပါဘူး... ဒီလို လုံခြုံမှုမရှိလို့ ရပ်လိုက်ကြမယ်ဆိုရင် လွန်ခဲ့သောအနှစ်ခြောက်ဆယ်ကထက် ဆိုးဝါးတဲ့ ဘဝတွေနဲ့ ခေတ်ဆိုးအမွေဆိုးတွေ ကိုယ့်သားသမီးကို လက်ဆင့်ကမ်းလိုက်ရပါလိမ့်မယ်။ 

ကျွန်မကိုယ်တိုင်လည်း လွန်ခဲ့တဲ့ ၃ ပတ်လောက်ထဲက ရှောင်ရင်းတိမ်းရင်း  လမ်းမပေါ်မှာပဲ အားလုံးနဲ့အတူ ရှိနေပါတယ်။ တိုက်ပွဲရှိရင် အောင်ပွဲရှိတာမို့ ပျော်ရာမှာမနေ တော်ရာကနေပဲ အရေးတော်ပုံအောင်တဲ့အထိ လုပ်စရာရှိတာတွေကို ဆက်လက်လုပ်နေမှာပါ။ 

မောင်မိုးမြင့်ရဲ့ ကို အနတ္တ အနော်မာရဲ့ ကဗျာထဲကလို

“ Keep  yourself  to  yourself

ပုံမပျက် ဆက်ဆံရေးနဲ့ တော်လှန်ရေးကို သွေးမြေမကျစေနဲ့

ဆင်ခြင်တုံတရား  ၊ ဥာဏ်ပညာ ၊ လက်ဖျံရိုးတွေကို ပူးကပ်ချည်နှောင်ထား

အဆင်သင့်သုံးလို့ရအောင် မြနေအောင်လည်း သွေးထား

အလိုက်သင့် စီးဆင်းရအောင် ငါတို့ဟာ အပျော်စီးလှေတွေ မဟုတ်ဘူး

ဆန်သင့်ရင် ဆန်တက်ရမယ် မြဲမြဲ ကိုင်ထား”

အရေးတော်ပုံ အောင်ရမည်!" ဆိုပြီး ရေးသားထားတာပဲ ဖြစ်ပြီး ပရိသတ်တွေအတွက် ဒီသတင်းကို တစ်ဆင့်ပြန်လည်ကူးယူတင်ဆက်ပေးလိုက် ရပါတယ်နော်။

Source and Photo Crd-Thandar Hlaing’s Facebook Page