ပြီးခဲ့တဲ့ဖေဖော်ဝါရီလ အစပိုင်းကတည်းက ပြည်သူတွေမှာ အကြမ်းဖက်ဖိနှိပ်မှုတွေကို ခံစားခဲ့ရပြီး အမျိုးမျိုးသောဆင်းရဲဒုက္ခတွေကို ရင်ဆိုင်ကြုံတွေ့နေကြရတာ ဖြစ်ပါတယ်။ ပြည်သူတွေနဲ့ တသားတည်းရပ်တည်နေတဲ့ သူရဲကောင်းတွေများစွာ အသက်ပေးခဲ့ကြရသလို ဆန္ဒပြနေတဲ့လူငယ်တွေအတွက် YBS ကားနဲ့တားဆီးပေးခဲ့တဲ့ YBS ယာဉ်မောင်း ကိုမောင်မောင်အေးကိုတော့ ပြည်သူတွေအားလုံး အမှတ်ရနေဦးမှာပါနော်။
ဒီကနေ့မှာတော့ သူရဲကောင်းတွေထဲက တစ်ဦးအပါအဝင်ဖြစ်တဲ့ YBS ယာဉ်မောင်းကိုမောင်မောင်အေး ကျဆုံးသွားရတဲ့ ဝမ်းနည်းစရာသတင်းကြောင့် ပြည်သူတွေအားလုံး ယူကြုံးမရ ရင်နင့်အောင် ခံစားနာကျင်နေကြရတာ ဖြစ်ပါတယ်။ YBS ယာဉ်မောင်းကိုမောင်မောင်အေးဟာ ဖေဖော်ဝါရီလ (၂၈)ရက်နေ့က ဖမ်းဆီးခံခဲ့ရပြီး (၇)လကြာပြီးနောက် ဒီကနေ့ စက်တင်ဘာလ (၂၁) ရက်နေ့မှာတော့ ရုပ်အလောင်းကို မိသားစုဝင်တွေဆီ လာပို့သွားတယ်လို့ သိရပါတယ်။
YBS ကားနဲ့ ကန့်လန့်ခံတားဆီးပေးခဲ့လို့ အဖမ်းခံရပြီး နှိပ်စက်မှုတွေနဲ့ အကြမ်းဖက်မှုတွေကြောင့် ကျဆုံးသွားခဲ့တဲ့ ယာဥ်မောင်း ကိုမောင်မောင်အေးအတွက် ပြည်သူတွေကလည်း မိသားစုတွေနဲ့အတူ ထပ်တူဝမ်းနည်းကြေကွဲနေကြရတာ ဖြစ်ပါတယ်။ ပြည်သူ့ သူရဲကောင်းတစ်ဦဖြစ်တဲ့ ကိုမောင်မောင်အေးအတွက် ကောင်းရာသုဂတိလားစေဖို့ အားလုံးကလည်း ဆုတောင်းမေတ္တာတွေ ပို့သထားကြတာလည်း တွေ့ရပါတယ်။