ယနေ့လှိုင်မြို့နယ်မှာဆိုရင် ပြည်သူတွေပြုလုပ်ထားတဲ့ လမ်းအကာအကွယ်အတားအဆီးများကို ဖြိုခွင်းမှုတွေပြုလုပ်ခဲ့တာကြောင့် အများစုကတော့ လမ်းတွေထဲမှာသာ ဆန္ဒထုတ်ဖော်လာတာကုိ တွေ့ရှိရပါတယ်။ လှိုင်မြို့နယ် ပြည်သူတွေရဲ့ လူထုလှုပ်ရှားမှုကို ဒီနေ့မှာတော့ တစ်ကြိမ်သာ လာရောက်ဖြိုခွင်းခြင်းရှိခဲ့တာကြောင့် အခါတိုင်းထက်ပိုပြီး ငြိမ်းချမ်းစွာ ဆန္ဒထုတ်ဖော်ခွင့်ရရှိခဲ့ကြပါတယ်။ ထိခိုက်ဒဏ်ရာရရှိသူနည်းပါးပေမယ့်လဲ အသံဗုံးဖြင့် ပစ်ခတ်မှုကြောင့် ဦးခေါင်းမှာဆောင်းထားတဲ့ ဦးထုပ် ကွဲသွားတဲ့အခြေအနေတွေတော့ ရှိခဲ့တယ်လို့သိရပါတယ်။
"ကျွန်တော်တို့တွေအားလုံး အခါတိုင်းထက်လူပိုညီလာတယ်၊ ပြီးတော့ အကာအကွယ်တွေအတွက် လှူဒါန်းပေးတဲ့သူတွေလည်းများတာကြောင့် ဒီနေ့ပိုပြီးတော့ အကာအကွယ်တွေလုပ်ထားတာအားကောင်းလာတယ်၊ အကုန်လုံးကလည်း ပိုပြီးတက်ကြွလာကြပါတယ်၊ နေပူထဲ ဆန္ဒထုတ်ဖော်ရမှာ စိုးလို့ ရပ်ကွက်က ကျွန်တော်တို့ အတွက် အပူခံအမိုးအကာတွေပါလုပ်ပေးထားတယ်။ တစ်ယောက်တစ်မျိုးစီအားဖြည့်ပေးကြတဲ့ ကျွန်တော်တို့လှိုင်သားတွေအားလုံးအတွက် ဂုဏ်ယူတယ်။ " လို့ ဆန္ဒထုတ်ဖော်ပြည်သူတစ်ဦးကပြောကြားခဲ့ပါတယ်။
ထို့အပြင် ဒီယနေ့ မတ်လ (၆)ရက်နေ့မှာ လှိုင်လူငယ်များနဲ့ မြန်မာနိုင်ငံ အင်ဂျင်နီယာများ အင်အားစု ငြိမ်းချမ်းစွာ ဆန္ဒထုတ်ဖော် ပြသခဲ့ကြပါတယ်။ "လောလောဆယ်တော့ အေးဆေးပါဘဲ။ ရဲတွေ စစ်တပ်တွေကတော့ ခုချိန်ထိမတွေ့သေးဘူး။ ဆန္ဒပြတဲ့သူတွေကလည်း ငြိမ်းချမ်းစွာ ဆန္ဒဖော်ထုတ်နေကြပါတယ်" လို့ ဆန္ဒပြသူတစ်ဦးကပြောပါတယ်။ ယနေ့လှိုင်မြို့နယ် အခြေအနေရဲ့ ဓာတ်ပုံတွေကိုလဲ တင်ပြလိုက်ပါတယ်။