ခုဆိုရင် မြန်မာနိုင်ငံမှာ ဖေဖော်ဝါရီ (၁) ရက်နေ့ကစပြီး တိုက်ပွဲဝင်ခဲ့တဲ့ သူရဲကောင်း (၇၀၀) ကျော်ကျဆုံးခဲ့သလို လူပေါင်းထောင်ချီပြီး ဖမ်းဆီးထိန်းသိမ်းခံခဲ့ရပါတယ်။ ဆန္ဒပြသူတွေဟာလည်း မရိုးနိုင်တဲ့နည်းလမ်းတွေနဲ့ နိုင်ငံတကာရဲ့ စိတ်ဝင်စားမှုရလာအောင် ဖန်တီးပြီး မိမိတို့ရဲ့ ယုံကြည်ချက်ပန်းတိုင်ကိုရောက်ဖို့ ရင်တွင်းခံစားချက်တွေကို ဖော်ထုတ်ခဲ့ကြပါတယ်။
လမ်းပေါ်ထွက်ပြီးဆန္ဒပြတဲ့သူတွေလည်းရှိသလို အိမ်မှာနေရင်းသတင်းတွေမျှဝေပြီး သံပုံးတီးကာ ပါဝင်နေသူတွေလည်းရှိကြပါတယ်။ ပြည်သူတွေဟာ ဘက်ပေါင်းစုံကနေ မိမိတို့ရဲ့ ဆန္ဒတွေကို အမျိုးမျိုးသောနည်းလမ်းတွေနဲ့ဖော်ထုတ်နေကြတာကိုတွေ့ရပြီး မနေ့ကဆိုရင်လည်း "ငါတို့ပြည်သူ ငါတို့ပြန်ပေး "ဆိုတဲ့ campaign ကို လူငယ်တွေစုပေါင်းပြီး လက်ဝါးပေါ်မှာ စာများရေးသားကာ မိမိတို့နေအိမ်မှာပဲ ပါဝင်လှုပ်ရှားခဲ့ကြတာတွေ့ရပါတယ်။
ဒီ campaign လေးကိုပြုလုပ်ရတဲ့ ရည်ရွယ်ချက်ကိုလည်း လူငယ်တစ်ယောက်က ခုလိုရင်ဖွင့်ပြောကြားလာပါတယ်။ " ဒီ Campaign ပြုလုပ်ရတဲ့ ရည်ရွယ်ချက်တော့ အဖမ်းစီးခံ ပြည်သူများအားလုံး၊ အပြစ်မဲ့ပြည်သူတွေအားလုံး နဲ့ အဖမ်းစီးခံ ကျောင်းသားများ အားလုံးကို အမြန်ဆုံး ပြန်လွှတ်ပေးဖို့အတွက် လုပ်တာပါ " လို့ အဆိုပါ Campaign တွင်ပါဝင်ခဲ့တဲ့ ပြည်သူတစ်ဦးက ပြောပါတယ်။