အင်တိုက်အားတိုက်နဲ့ ပြန်လည်အားကောင်းလာတဲ့ ဆန္ဒထုတ်ဖော်မှုတွေကတော့ ဒီကနေ့ ဧပြီလ ၂၈ ရက်နေ့မှာလည်း အားကောင်းနေခဲ့ပါတယ်။
ရန်ကုန်တိုင်းအတွင်းက မြို့နယ်တွေမှာလည်း အမျိုးမျိုးသောပုံစံတွေနဲ့ ဆန္ဒထုတ်ဖော်မှုတွေကို နေ့စဥ်ရက်ဆက်ဆိုသလို ပြန်မြင်တွေ့လာရပါတယ်။
ဒီကနေ့မှာဆိုရင်လည်း paper strike လူထုလှုပ်ရှားမှုအနေနဲ့ ရန်ကုန်မြို့အတွင်းက ဘတ်(စ်) ကားတွေပေါ်မှာ စာရွက်တွေကပ်တဲ့ လှုပ်ရှားမှုဟာ facebook ပေါ်မှာသာမက twitter ပေါ်ထိပျံ့နှံ့နေတာကိုတွေ့ရပါတယ်။
လူငယ်တွေဟာ စာရွက်တွေပေါ်မှာ ကိုယ်ရေးချင်တဲ့ စာလုံးတွေရေးပြီး ဆန္ဒထုတ်ဖော်ကြတဲ့ ဒီလှုပ်ရှားမှုဟာ ရန်ကုန်မှာသာမက အခြားသောမြို့တွေမှာလည်း ပြုလုပ်ကြတာကိုတွေ့ရပါတယ်။
ဒါ့အပြင် ချီတက် သပိတ်စစ်ကြောင်းတွေအနေနဲ့ မန္တလေး ၊ ထားဝယ် ၊ မြစ်ကြီးနား နဲ့ အခြားသောမြို့နယ်တွေမှာ ဒီကနေ့မနက်ပိုင်းက ချီတက်ဆန္ဒထုတ်ဖော်ခဲ့ကြပါတယ်။
သို့ပေမယ့် မန္တလေးက ကျောင်းသားတွေများစွာပါဝင်တဲ့ သပိတ်စစ်ကြောင်းဟာ ချီတက်ဆန္ဒထုတ်ဖော်နေစဥ်အတွင်း ဖြိုခွဲခံရတာကြောင့် ဖမ်းဆီးခံရသူတွေရှိခဲ့တယ်လို့လည်း သိရပါတယ်။