ချို့တဲ့လွန်းတဲ့ဘဝတွေကြောင့် ကလေးတစ်ယောက်ရဲ့ အသက်ကို အချိန်မီ မကယ်တင်လိုက်နိုင်လို့ ယူကျုံးမရဖြစ်နေတဲ့ ဝေဠုကျော်ဖောင်ဒေးရှင်း

ပြီးခဲ့တဲ့ရက်ပိုင်းလောက်ကတည်းက တောင်ဥက္ကလာ ကျောက်ခွဲစက် ကျူးမိသားစုတွေအတွက် နေအိမ်အမိုးအကားတွေကို ပြန်လည်ပြုပြင်ပေးနေရင်း ပလုံကောက်တဲ့ မိသားစုလေးရဲ့အိမ်ကို ပြန်ပြင်ပေးတဲ့အကြောင်း ဝေဠုကျော်ဖောင်ဒေးရှင်းက ပြောပြလာခဲ့ပါသေးတယ်။ မွေးချင်း (၇) ယောက်ရှိတဲ့အထဲက အငယ်ဆုံးအမွှာသမီးလေးက အနာပေါက်ရာကပိုးဝင်နေတာကြောင့် ဆေးရုံတင်ပြီးကုသပေးခဲ့ပါသေးတယ်။ နောက်ထပ် (၂) ရက်အကြာမှာ ကလေးအသည်းအသန် ဖြစ်တာကြောင့် ဆေးရုံထပ်ပို့ပေးခဲ့ပေမယ့် ကလေးရဲ့အသက်ကို အချိန်မီမကယ်တင်နိုင်ခဲ့ပါဘူး။

ချို့တဲ့လွန်းတဲ့ဘဝတွေမှာ အသက်ကိုတောင်အချိန်မီကယ်တင်နိုင်စွမ်းမရှိတာတော့ ရင်နာစရာကောင်းလွန်း ပါတယ်။ ကလေးမဆုံးပါးခင်ကရိုက်ခဲ့တဲ့ အမှတ်တရပုံလေးတွေကို " ဒီကလေးလေး ဆုံးသွားရှာပြီ။ တောင်ဥက္ကလာ ကျူးကပါ မောင်နှမ (၇) ယောက်ထဲက အငယ်ဆုံး အမွှာထဲက တစ်ယောက်ပေါ့။ သားသမီးကများ အလုပ်အကိုင်ကပလုံကောက် မိသားစု ၊ဝါးအိမ်လေး အသစ်ပြန်ဆောက်ထားပေမယ့် အမိုးအကာအပြီးထိမလုပ်နိုင်သေး။ ကိုယ်တွေအဖွဲ့သွားမိုးကာပေးတော့ အနာပေါက်နေမှန်းသိတော့ ကလေးကို ဆေးရုံပို့ပေးခဲ့တယ်။ "

" (၂) ရက်ပဲအကြာ ကလေးအသည်းအသန်ဖြစ်လို့ မနက်စောစော ဆေးရုံနောက်တစ်ခေါက် ထပ်ပို့ပေးခဲ့တယ်။ ဆေးရုံမှာကလေးဆုံးရှာတယ်။ အနာတွေကပိုးဝင်ပြီး နောက်ကျသွားတာပါ။ ပထမ ဆန်၊ဆီ လှူပေးတုန်းကတောင် ချီပိုးခဲ့သေးတယ်။ အခုတော့ ငယ်ငယ်နဲ့ပဲ လောကကြီးကို စွန့်ခွာသွားရှာတယ်။ အခုတော့ အိမ်လေးပြီးသွားလို့ မိသားစုတွေ မပျော်နိုင်တော့ဘူးလေ။ ဆင်းရဲခြင်း၊ဗဟုသုတနည်းပါးခြင်းတွေရဲ့ အကျိုးဆက်တွေပေါ့။ ကောင်းရာသုဂတိလားပါစေ လို့ပဲ ဆုတောင်းပေးလိုက်ပါတယ် သမီးလေးရေ။ နောင်ဘဝတွေမှာ အသက်ရှည် ကျမ်းမာပါစေ ကွယ်။ " ဆိုပြီး ဝေဠုကျော်ဖောင်ဒေးရှင်းက ဝေမျှပေးခဲ့ပါတယ်။ ရောက်လေရာဘဝတိုင်းမှာ အနာရောဂါကင်းပြီး ကျန်းမာသက်ရှည်ပါစေကလေးရေ။

သတင်း အရင်းအမြစ်៖ Wai Lu Kyaw Foundation's FB Acc