ဖမ်းဆီးထိန်းသိမ်းမှုတွေ နေရာတိုင်းမှာ များပြားနေပေမယ့် ပြည်သူတွေရဲ့ စစ်အာဏာရှင် တော်လှန်ရေး သပိတ်စစ်ကြောင်းတွေကတော့ နေ့ရက်တိုင်း ထွက်ပေါ်နေကြဆဲဖြစ်ပါတယ်။ အရင်လို အင်အားများစွာနဲ့ ဆန္ဒထုတ်ဖော်ရန် မလွယ်ကူတာကြောင့် ပြောက်ကျားသပိတ်တွေဆင်နွှဲကာ အာဏာရှင်စနစ်ကိုအဆုံးထိတော်လှန်နေကြတာဖြစ်ပါတယ်။ ပြည်သူတွေဘက်က အခုလို ဆန္ဒပြသပိတ်တွေထွက်ကြသလို ပြည်သူ့ကာကွယ်ရေးတပ် PDFတွေဖွဲ့စည်းပြီးတော့လည်း စစ်အာဏာရှင်တွေကိုတော်လှန်နေကြတာဖြစ်ပါတယ်။
ခုချိန်မှာ ပြည်သူအားလုံးက ပန်းတိုင်တစ်ခုတည်းကို လျှောက်လှမ်းနေတဲ့ ရင်ဘတ်ချင်း တူညီကြသူတွေမို့ ကိုယ်လုပ်နိုင်တဲ့ နေရာကနေ လုပ်နိုင်တာ မှန်သမျှဆောင်ရွက်နေကြတာပါ။ ယနေ့မှာဆိုရင်လည်း မိုးသည်းသည်းမည်းမည်းရွာနေတဲ့ကြားကနေ မိုးကောင်းမြို့ကပြည်သူတွေက အာဏာရှင်ဆန့်ကျင်ရေးဆန္ဒပြသပိတ်ပြုလုပ်ခဲ့ကြတာဖြစ်ပါတယ်။ စစ်ကောင်စီတပ်တွေကင်းပတ်နေတဲ့ကြားက မိုးကာလေးတွေကိုယ်စီ၀တ်ကာ ပြေးရင်းလွှားရင်းဆန္ဒဖော်ထုတ်နေကြတဲ့ ပြည်သူတွေရဲ့သတ္တိကတော့လေးစားစရာပါပဲ ....။
ဒီသပိတ်စစ်ကြောင်းမှာဆိုရင် အမျိုးသမီးအများစုပါ၀င်ကြပြီး လမ်းသွယ်လေးတွေကနေတစ်ဆင့် ဆိုင်းဘုတ်ကိုင်ကာ ကြွေးကြော်ကြရင်းဆန္ဒဖော်ထုတ်နေကြတာပါ။ ဒီဗီဒီယိုလေးက လူမှုကွန်ယက်စာမျက်နှာမှာ ချက်ချင်းပျံ့နှံ့လာခဲ့တာလည်းဖြစ်ပါတယ်။ ပရိသတ်တွေအတွက် ပြန်လည်မျှဝေပေးလိုက်ပါတယ်နော်။
သတင်း အရင်းအမြစ်៖ Myanmarload