ကယားပြည်နယ်၊ကရင်ပြည်နယ်နဲ့ ချင်းပြည်နယ်တို့မှာ အခုလက်ရှိမှာဆိုရင်တိုက်ပွဲတွေတောက်လျှောက်ဖြစ်ပေါ်နေပြီး အထိအခိုက်အကျအဆုံးများလာနေတယ်လို့သိရပါတယ်။ တိုက်ပွဲပြင်းထန်နေတာကြောင့် ဒေသခံပြည်သူတွေမှာလည်း နေရပ်ကိုစွန့်ခွာကာ တောတောင်ထဲတွေမှာသွားရောက်ခိုလှုံနေရပြီး ဆင်းရဲဒုက္ခတွေနဲ့တွေ့ကြုံခံစားနေကြရတာဖြစ်ပါတယ်။ ပြည်သူ့ကာကွယ်ရေးတပ်တွေအနေနဲ့လည်း ရရာလက်နက်ဆွဲကိုင်ကာခုခံတော်လှန်နေကြပေမယ့် လက်နက်အင်အားမမျှတာကြောင့် ပြည်သူတွေရဲ့စည်းစိမ်ဥစ္စာတွေအထိပါ ဖျက်ဆီးခံနေရတာဖြစ်ပါတယ်။
မိုးတွင်းကာလလည်းဖြစ်တဲ့အပြင် ရိက္ခာမလုံလောက်မှုတွေနဲ့ နေစရာအိမ်အဆင်မပြေမှုတွေကြောင့် စစ်ဘေးရှောင်တိုင်းရင်းသားတွေခမျာ နေ့စဉ်နဲ့အမျှဒုက္ခပင်လယ်ဝေနေကြရတာဖြစ်ပါတယ်။ အခုလိုမိုးတွင်းကာလမှာ တောတောင်ထဲမှာနေနေရတာ တကယ်ကိုမလွယ်ကူလှတဲ့ကိစ္စတစ်ခုပါ။ အမိုးအကာမလုံခြုံနဲ့ ဆင်းရဲပင်ပန်းစွာနေရတဲ့အပြင် ခြင်တွေ၊မျော့တွေနဲ့ ဖြုတ်တွေကိုက်ခံရမှုတွေကြောင့်လည်း ပြည်သူတွေခမျာ အနာတွေပါဖြစ်နေကြရတယ်လို့သိရပါတယ်။
ပြည်မထဲကပြည်သူတွေ နွေးနွေးထွေးထွေးနဲ့ အိပ်ယာထဲမှာ နေနေကြတဲ့အချိန် စစ်ဘေးရှောင်ပြည်သူတွေကတော့ တောတောင်ထဲတွေမှာ ကျီးလန့်စာစားနဲ့နေနေကြရတာပါ။ ကလေးသူငယ်လေးတွေခမျာလည်း မိုးထဲရေထဲမှာ စစ်ဘေးရှောင်နေကြရင်း ခြင်တွေအကိုက်ခံရတာကြောင့် ခန္ဓာကိုယ်တစ်ခုလုံးအနာတွေဖြစ်နေတဲ့ပုံရိပ်တွေကို စစ်ဘေးရှောင်ပြည်သူတစ်ဦးက လူမှုကွန်ယက်စာမျက်နှာမှာတင်ပေးလာခဲ့ပါတယ်။ ပရိသတ်တွေအတွက် ပြန်လည်ဖော်ပြပေးလိုက်ပါတယ်။
သတင်း အရင်းအမြစ်៖ Myanmarload