ရှမ်းပြည်နယ် အရှေ့ပိုင်း မိုင်းပျဉ်းမြို့နယ်တွင် ယမန်နေ့က မိုးအဆက်မပြတ်ရွာသွန်းမှုကြောင့် တောင်ကျရေတိုက်စားပြီး မြေပြိုကာ လမ်းလုပ်သား (၁၂)ဦး ရေထဲမျောပါသွားတယ်လို့ သိရပါတယ်..။
လမ်းရှင်းပေးနေတဲ့အချိန် တောင်ပြိုရေကြီးလာလို့ ရေစီးထဲမျောပါသွား လမ်းလုပ်သား(၁၂)ဦးထဲ (၁)ဦးကို အသက်ရှင်လျက် ပြန်တွေ့ခဲ့ပေမယ့် (၁၁)ဦးကတော့ ပျောက်ဆုံးနေဆဲ ဖြစ်ပါတယ်..။
မိုးသည်းထန်စွာရွာသွန်းပြီးနောက် တောင်ပြို၊ လမ်းပိတ်နေတဲ့အတွက် ပြည်သူ့ဆောက်လုပ်ရေးအဖွဲ့က လမ်းရှင်းပေးနေစဉ် နောက်ထပ် တောင်ပြိုကျကာ ရေကြီးလာတဲ့အတွက် လမ်းလုပ်သားတွေ၊ စက်ယန္တာယားတွေ ရေစီးနဲ့အတူ မျောပါသွားကြတာ ဖြစ်ပါတယ်..။
လမ်းအထူးတပ်ဖွဲ့(၃)မှ ဦးအာကာကျော် အပါအဝင် ကျား(၈)ဦး၊ မ(၄)ဦး စုစုပေါင်း (၁၂)ဦးဟာ တောင်ကျချောင်းရေတိုက်စားပြီး တောင်ပြိုကျမှုကြောင့် ရေစီးနှင့်အတူ နမ့်လုံချောင်းအတွင်းသို့ မျောပါသွားခဲ့တာဖြစ်ကြောင်း သိရပါတယ်..။
မိုင်းပျဉ်း − တာကောလမ်းပိုင်း ဆင်မောင်ကျေးရွာအုပ်စု (၇)မိုင်နှင့် (၉)မိုင်ကြားမှာ လမ်းတိုးချဲ့လုပ်ငန်းဆောင်ရွက်နေတဲ့ လမ်းလုပ်သားများဖြစ်ပြီး (၁၁)ဦး ပျောက်ဆုံးနေသေးကြောင်းကိုတော့ ဒေသခံတစ်ဦးက ပြောပြလာတာ ဖြစ်ပါတယ်..။
မိုင်းပျဉ်းမြို့နယ်တွင် ချောင်းရေများ ပြန်ကျသွားပြီဖြစ်သော်လည်း မိုင်းပျဉ်း − တာကော လမ်းပိုင်းကိုတော့ ယာယီပိတ်ထားရပြီး နောက် (၂)ရက်ခန့်ထိ ဆက်လက်ပိတ်ထားရမှာဖြစ်တယ်လို့လည်း သိရပါတယ်..။