(၅)ရက်လောက်အစာမစားရဘဲ လူမနေတဲ့တိုက်အပေါ်ဆုံးထပ်မှာ ပိတ်မိနေတဲ့ ခွေးလေးကို သွားရောက်ကယ်ဆယ်ခဲ့ကြတဲ့ ပရဟိတသမားများ

ရန်ကုန်မြို့၊စမ်းချောင်းမြို့နယ်၊ဇေယျဝတီဗဟိုလမ်းထဲက လူမနေတဲ့တိုက်အပေါ်ဆုံးထပ်မှာ ခွေးလေးတစ်ကောင်ပိတ်မိနေခဲ့ပါတယ်။ အစာမစားရတာကြာပြီဖြစ်တာကြောင့် နေတိုင်းအူနေတဲ့ ခွေးလေးရဲ့အသံကို ပတ်ဝန်းကျင်ပြည်သူတွေက နေ့စဥ်ရက်ဆက်ကြားနေရတာဖြစ်ပါတယ်။ အဆိုပါခွေးလေးဟာ( ၅)ရက်လောက် တိုက်အပေါ်ဆုံးထပ်မှာပိတ်မိနေတာဖြစ်သလို အစာလည်းမစားရဘဲ ဒုက္ခရောက်နေခဲ့တာဖြစ်ပါတယ်။ အဆိုပါခွေးလေးဟာ တိုက်အပေါ်ဆုံးထပ်ကို တက်ရင်းနဲ့ ပြန်မဆင်းတတ်တော့ဘဲ အခုလိုပိတ်မိနေခဲ့တာဖြစ်ပါတယ်။

နောက်ဆုံးမှာတော့ ပြည်သူတစ်ဦးက ဇေယျဝတီလမ်း၊ကွန်ဒို(၈)လွှာမှာ ခွေးလေးတစ်ကောင် ပိတ်မိနေကြောင်း၊ ကူညီကယ်ဆယ်ပေးနိုင်မယ့်လူရှိရင် သွားရောက်ကယ်ဆယ်ပေးကြဖို့ မေတ္တာရပ်ခံကြောင်း လူမှုကွန်ယက်စာမျက်နှာထက်မှာတင်ပြီး အကူအညီတောင်းခံခဲ့ပါတယ်။ ယနေ့မနက်မှာတော့ ပရဟိတသမားတွေက အရေးပေါ်လှေကားမှ တစ်ဆင့်တွယ်တက်ပြီး ပိတ်မိနေတဲ့အဆိုပါခွေးလေးကို သွားရောက်ကယ်ဆယ်ခဲ့ကြပါတယ်။ အစာမစားရတာ (၅)ရက်လောက်ရှိပြီဖြစ်တဲ့ ခွေးလေးကို ပရဟိတသမားတွေက အစာကျွေးမွေးခဲ့ပြီး ပိုင်ရှင်ထံပြန်လည်ပေးအပ်ခဲ့ကြောင်း သိရှိရပါတယ်။

ပြည်သူတွေကတော့ ဒုက္ခရောက်နေတဲ့ ခွေးလေးကို အခုလိုသွားရောက်ကယ်ဆယ်ပေးခဲ့ကြတဲ့ ပရဟိတသမားတွေကို ကျေးဇူးတင်စကားပြောဆိုနေကြပါတယ်။ သွားရောက်ကယ်ဆယ်ပေးခဲ့တဲ့ ပရဟိတသမားတစ်ဦးကတော့ " မနေ့ညကစမ်းချောင်းGPတွေထဲ၊ခွေးချစ်သူGPထဲနာမည်ကြီးနေတဲ့ စမ်းချောင်း၊ဇေယျဝတီဗဟိုလမ်း၊ကွန်ဒို(8)လွှာလူမနေကြသေးတဲ့ တိုက်အပေါ်ဆုံးမှာရောက်နေတဲ့ ခွေးလေးကို ကျွန်တော်တို့ စမ်းချောင်းအရန်မီးသတ်(ရဲသူရိန်)အဖွဲ့နဲ့စမ်းချောင်းမြို့နယ်မီးသတ်စခန်းမှ စခန်းမှူးနှင့်အဖွဲ့တို့ နောက်ဖေး အရေးပေါ်လှေကားမှတဆင့်တွယ်တက်ပြီး ကယ်ဆယ်ပြီးပါပြီ ခွေးလေးက အစာမစားရတာ (၅)ရက်လောက်ရှိပြီဖြစ်လို့ ကျွန်တော်ရုံးမှာ အစာသေချာကျွေးပြီး တရုတ်ကျောင်းလမ်းကပိုင်ရှင်တွေထံ ပြန်လည်အပ်နှံပေးလိုက်ပါပြီခင်ဗျာ "ဆိုပြီး လူမှုကွန်ယက်ထက်မှာ ရေးသားထားခဲ့ပါတယ်။

Source: Original Uploder