ပြီးခဲ့တဲ့ မတ်လ (၃) ရက်နေ့မှာကျဆုံးသွားခဲ့တဲ့ မန္တလေးက သူရဲကောင်မလေး ကြယ်စင် (ခ) တိန့်ကျားရှီကို ပြည်သူလူထုကြီးကသတိတရရှိနေဆဲပါပဲ။ ဒီနေ့ သြဂုတ်လ (၃) ရက်နေ့ဟာတော့ သူမ ကျဆုံးခဲ့တာ (၅) လ တိတိပြည့်တဲ့နေ့ပဲဖြစ်ပါတယ်။ အမှန်တရားအတွက်တိုက်ပွဲဝင်ရင်း သိက္ခာရှိရှိ ကျဆုံးသွားခဲ့တာမို့ ပြည်သူတွေဟာ သူမရဲ့သေဆုံးမှုအတွက် နှမြောတသဖြစ်ရသလို ဂုဏ်လည်းယူနေကြပါတယ်။ အဖေတစ်ခု သမီးတစ်ခုဘဝမှာ ဖခင်ဖြစ်သူဟာ တစ်ယောက်တည်း ကျန်ရစ်ခဲ့ပေမယ့် ကြယ်စင်ရဲ့ ဖခင်ဟာ ကျဆုံးသွားတဲ့သမီးလေးအတွက် အမြဲတမ်းဂုဏ်ယူနေခဲ့သူတစ်ယောက်ပါ။
သမီးလေးကျဆုံးခဲ့စဉ်က မေတ္တာကြေးတွေလာရောက်ပေးကမ်းကြတာရှိပေမယ့် ဒီငွေတွေကို လိုအပ်တဲ့နေရာမှာအသုံးပြုဖို့ အားလုံးပြန်လည်လှူဒါန်းပေးခဲ့ပါတယ်။ အနာဂတ်ကောင်းတွေ ပိုင်ဆိုင်ထားတဲ့ (၁၉) နှစ်အရွယ် မိန်းမငယ်လေးဟာ သတ္တိအပြည့်နဲ့ ယုံကြည်ရာအတွက် အသက်စွန့်သွားခဲ့တာတကယ်ကို လေးစားစရာကောင်းလွန်းပါတယ်။ သူမကိုယ်တိုင်လည်း လူငယ်တစ်ယောက်ဖြစ်သလို တခြားလူငယ်တွေရဲ့အနာဂတ်တွေ မပျောက်စေဖို့ စွမ်းစွမ်းတမံ တိုက်ပွဲဝင်ရင်း သိက္ခာရှိရှိကျဆုံးခဲ့ရတာပါ။
အချိန်တွေဘယ်လောက်ပဲကြာသွားပါစေ သူမ ကျဆုံးခဲ့တဲ့နေ့ရက်ရောက်တိုင်း ပြည်သူလူထုကြီးက သတိတရနဲ့ လွမ်းဆွတ်နေဦးမှာပါ။ အမှန်တရားဆိုတာဘယ်တော့မှ ပျောက်ဆုံးမသွားသလို အမှန်တရားအတွက် တိုက်ပွဲဝင်ခဲ့တဲ့ သူရဲကောင်းတွေရဲ့ နာမည်ဂုဏ်သတင်းဟာလည်း ဘယ်တော့မှ မတိမ်ကောသွားပါဘူး။ ပြည်သူအားလုံးရဲ့ရင်ထဲမှာ နွေဦးတော်လှန်ရေးမှာကျဆုံးသွားခဲ့ရတဲ့ ပြည်သူ့သူရဲကောင်းတွေရဲ့နာမည်ဟာ ကဗျည်းတင်ပြီးသားဖြစ်နေမှာပါ။ ကျဆုံးသွားခဲ့တဲ့ သူရဲကောင်းတိုင်းလည်း ကောင်းမွန်တဲ့ဘုံဘဝတွေမှာ အေးချမ်းသာယာရှိနေပါစေလို့ တောင်းဆုပြုပါတယ်။
သတင်း အရင်းအမြစ်៖ MDY Revolution's FB Acc