တိုက်ပွဲတွေဖြစ်နေတဲ့ကာလအတွင်း စစ်ဘေးရှောင်မိခင်ရဲ့ဗိုက်ထဲကနေ လူ့လောကကြီးထဲကို အောင်မြင်စွာရောက်ရှိလာတဲ့ ကလေးငယ်လေး

အာဏာသိမ်းမှုဖြစ်ပွားအပြီး ချင်းပြည်နယ်၊မင်းတပ်မှာ စစ်ကောင်စီတပ်တွေနဲ့ ဒေသခံပြည်သူ့ကာကွယ်ရေးတပ်တွေအကြား တိုက်ပွဲတွေမကြာခဏဖြစ်ပွားနေခဲ့ပါတယ်။ အဆိုပါတိုက်ပွဲတွေကြောင့် ဒေသခံပြည်သူတွေဟာလည်း ဘေးလွတ်ရာနေရာတွေ၊တောတောင်တွေထဲ သွားရောက်ပြီး စစ်ဘေးရှောင်နေခဲ့ရပါတယ်။ စစ်ဘေးရှောင်ပြည်သူတွေထဲ ကလေးငယ်တွေ၊သက်ကြီးရွယ်အိုတွေနဲ့ ကိုယ်ဝန်ဆောင်မိခင်တွေအများဆုံးပါဝင်နေကြကာ အကူအညီတွေလည်း လိုအပ်လျက်ရှိနေတာဖြစ်ပါတယ်။ ချင်းပြည်နယ်၊မင်းတပ်မြို့နယ်ကတော့ စစ်အုပ်ချုပ်ရေးကြေညာခံထားရတဲ့ မြို့နယ်တစ်ခုပဲဖြစ်ပါတယ်။

ယနေ့သြဂုတ်လ(၃)ရက်နေ့မှာတော့ ချင်းပြည်နယ်၊ မင်းတပ်ရှိ စစ်ဘေးရှောင်စခန်းတစ်ခုက ကိုယ်ဝန်ဆောင်မိခင်တစ်ယောက်ဟာ သူမရဲ့ရင်သွေးငယ်လေးကို အောင်မြင်စွာမွေးဖွားနိုင်ခဲ့ကြောင်း သိရှိရပါတယ်။ အဆိုပါကလေးငယ်လေးဟာ တိုက်ပွဲတွေဖြစ်နေတဲ့ကာလအတွင်းမှာပဲ စစ်ဘေးရှောင်မိခင်ရဲ့ဗိုက်ထဲကနေ လူ့လောကကြီးထဲကို အောင်မြင်စွာရောက်ရှိလာခဲ့တာဖြစ်ပါတယ်။ မွေးဖွားလာပြီးပြီးချင်း အချိန်ပိုင်းအတွင်းမှာပဲ မျက်လုံးလေးပွင့်လာပြီး မျက်နှာပြုံးရွှင်နေတဲ့ အဆိုပါကလေးငယ်လေးကိုကြည့်ကာ ပြည်သူအများအပြားက ချစ်ခင်နေကြပါတယ်။

ယခုမှာတော့ ကလေးမွေးဖွားထားတဲ့ မိခင်ဖြစ်သူရော ကလေးငယ်လေးပါ ကျန်းမာရေးကောင်းမွန်တယ်လို့ သိရှိရပါတယ်။ ပြည်သူတစ်ဦးကတော့ " တိုက်ပွဲကာလအတွင်း ​မွေးဖွားတဲ့က​လေး​လေး သိပ်ချစ်ဖို့​ကောင်းတယ်ဗျာ သူငယ်ချင်း Nine Shing Aung နဲ့ ညီမ​လေး Yaung Nge တို့ရဲ့ ကြိုးစား​ပေးဆပ်မှု နှင့်အတူ လူ့လောကဆီ အ​ရောက်ပို့​ဆောင်နိုင်ခဲ့တယ်။ တကယ်ကို ​ကျေးဇူးတင်တယ်"ဆိုပြီး လူမှုကွန်ယက်စာမျက်နှာထက်မှာ ရေးသားထားခဲ့ပါတယ်။ မွေးဖွားပြီးပြီးချင်း ပြုံးရွှင်နေတဲ့ ကလေးငယ်လေးရဲ့ ချစ်စရာပုံရိပ်လေးတွေကို ပရိသတ်တွေအတွက် ပြန်လည်ဖော်ပြပေးလိုက်ရပါတယ်။

Source : Original Uploder