ကိုဗစ် ရောဂါကူးစက်မှု နှုန်းတွေကတော့ မြင့်တက်နေဆဲ ရှိနေတာကို တွေ့ရပါတယ် ။ ဒီအတော်အတွင်း ရောဂါ ပျောက်ကင်းသွားကြသူတွေလည်း ရှိကြသလို သေဆုံးနေကြသူတွေလည်း များစွာရှိနေသေးတာ စိတ်မကောင်းစရာ မြင်ကွင်းတွေပါပဲ ။ သေဆုံးသူတွေ များလို့ ပရဟိတ အသင်းသားတွေ အပြင် သင်္ဂြိုလ်တဲ့နေရာတွေမှာလည်း အတော်လေး အခက်တွေ့နေကြတာပါ ။
မနေ့က ဩဂုတ်လ (3) ရက်နေ့မှာဆိုရင်လည်း သန်လျင် သဘာဝရိပ်သာမှာ ကိုဗစ်ကြောင့် သေဆုံးသူ အယောက် (၃၀) ရှိတယ်လို့ သိရပါတယ် ။ သေဆုံးသူ အလောင်းတွေကို အခန်းငယ် တစ်ခုမှာ စုထားပြီး ပရဟိတ အသင်းတွေက လာရောက် သယ်ဆောင်ပေးနေတာကို ပုံထဲမှာတွေ့ရမှာပါ ။ တကယ်ကို ကြေကွဲဝမ်းနည်းစရာကောင်းတဲ့ အခြေအနေတွေပါပဲနော် ။
ဒါကြောင့် ဒီထက်ပိုပြီး မဆိုးရအောင် ပြည်သူတွေ အယောက်စီတိုင်းလည်း ကိုယ်ကစပြီး ဂရုစိုက်နေထိုင်ဖို့ အရမ်းလိုအပ်ပါတယ် ။ ဒီကာလမှာတော့ ဖြစ်နိုင်ရင် အိမ်မှာပဲနေသင့်ပြီး မတတ်သာလို့ အပြင်ကို ထွက်ရရင်တောင် ရောဂါပိုးတွေက ကူးစက်ပါလာနိုင်တာမို့ ပြန်ရောက်တာနဲ့ ရေချိုး ၊ လက်ဆေးတာတွေ ပြုလုပ်ဖို့ တိုက်တွန်းလိုက်ပါရစေ ။ပရိသတ်ကြီးအတွက် သန်လျင်သဘာဝရိပ်သာက လက်ရှိ အခြေအနေတွေကို ပြန်လည်ဝေမျှပေးလိုက်ပါတယ် ။