ဖခင်ရဲ့ရက်လည်နေ့မှာ အပင်ပန်းခံချက်ထားတဲ့ ထောပတ်ထမင်းတွေကို ကိုယ်တိုင်ကိုယ်ကျလှူဒါန်းပေးခဲ့တဲ့ ညီနန္ဒ

Covid တတိယလှိုင်းရဲ့ ရိုက်ခတ်မှုတွေကြားမှာ မိသားစုကိုခွဲခွာသွားခဲ့တဲ့ ညီနန္ဒရဲ့ဖခင်ဟာ ဒီနေ့မှာ ရက်လည်သွားခဲ့ပါပြီ။ တစ်သက်လုံးကျန်းကျန်းမာမာရှိနေခဲ့တာကြောင့် တစ်ချက်လေး သတိလွတ်သွားတဲ့အချိန်မှာပဲ ရောဂါဆိုးကြီးရဲ့ဝါးမြိုမှုကိုခံလိုက်ရတာပါ။ မိဘနှစ်ပါးလုံး နေမကောင်းဖြစ်နေတာကြောင့် အတော်လေးစိတ်ပူပြီး အစစအရာရာဂရုစိုက်ပေးခဲ့တဲ့ညီနန္ဒဟာ ကျန်ရစ်ခဲ့တဲ့ မိခင်ဖြစ်သူကိုလည်း ပိုပြီးဂရုစိုက်ပေးတာကြောင့် အခုဆိုရင်မိခင်ဖြစ်သူဟာ အတော်လေးသက်သာလာခဲ့ပါပြီ။ ဖခင်ရဲ့ရက်လည်နေ့မှာတော့ သူ့ဖခင်အကြိုက်ဆုံးဖြစ်တဲ့ ထောပတ်ထမင်းလေးကို ခင်မင်ရသူတွေနဲ့ အစစအရာရာကူညီပေးသူတွေအတွက် အာဟာရဒါနပြုခဲ့ပါတယ်။

ဖခင်ဖြစ်သူအတွက် အလှူလုပ်ခဲ့တဲ့ပုံရိပ်တွေကို " ဒီနေ့ အဖေ့ရက်လည်အလှူအတွက် အဖေအရမ်းကြိုက်တဲ့ " ကိုနန္ဒ ထောပတ်ထမင်း " ရဲ့ မျိုးဆက် " စနိုးဦး ထောပတ်ထမင်း " ပွဲ  (၂၅၀) ကို ဘုန်းကြီးကျောင်းနေ့ဆွမ်း, အဖေ့မိတ်ဆွေအိမ်များ, အဖေအသည်းအသန်ဖြစ်နေချိန် စောင့်ရှောက်ပေးခဲ့ကြတဲ့ ဆရာဝန်များ, ကိုဝေဠုကျော် ဖောင်ဒေးရှင်း, ဒီရက်ပိုင်း စိတ်ရောကိုယ်ပါ ပင်ပန်းနေကြတဲ့ ပရဟိတအဖွဲ့များ, အဖေ့ခန္ဓာကိုယ် မီးသဂြိုလ်ခဲ့တဲ့ ကြည်စုသုသာန်မှ ပရဟိတ ဝန်ထမ်းများသို့ ပေးပို့လှူဒါန်းခဲ့ပါတယ် သားတို့ပြုသမျှကုသိုလ်တွေကို ထပ်တူရပြီး ငြိမ်းချမ်းစွာအနားယူပါ အဖေ??? " ဆိုပြီး ဝေမျှခဲ့ပါတယ်။

အသက်ကြီးတဲ့လူကြီးပိုင်းတွေအနေနဲ့ ဒီရောဂါဆိုးကြီးကိုတွန်းလှန်ဖို့ဆိုရင် ကိုယ်ခံအားကောင်းအောင်နေပြီး အားရှိတာတွေများများစားပေးဖို့လိုအပ်ပါတယ်။ တတ်သိနားလည်တဲ့ ဆရာဝန်တွေရဲ့ ညွှန်ကြားချက်အတိုင်း အသေအချာလိုက်နာမယ်ဆိုရင် ဒီရောဂါဆိုးကြီးကို တွန်းလှန်နိုင်မှာပါ။ ကံမကောင်းအကြောင်းမလှလို့ ကွယ်လွန်သွားခဲ့ရသူတွေလည်း ကောင်းရာဘုံဘဝမှာအေးချမ်းပြီး သာယာပျော်ရွှင်နိုင်ပါစေလို့ ဆုမွန်ကောင်းတောင်းပေးပါတယ်။

သတင်း အရင်းအမြစ်៖ Nyi Nanda's FB Acc