နိုင်ငံရေးအခြေအနေတွေအပါအဝင် ကိုဗစ်ကပ်ရောဂါတွေကြောင့် မြန်မာပြည်သူတွေဟာ စားဝတ်နေရေးခက်ခဲတဲ့ အခက်အခဲတွေနဲ့ တစ်ခြားပြဿနာတွေများစွာကို ရင်ဆိုင်နေရပါတယ်။ ယခုလို ပြည်သူအများအပြားဒုက္ခရောက်နေချိန်မှာ ကိုယ်ကျိုးကိုသာကြည့်ပြီး စီးပွားရှာနေသူတွေလည်း ရှိသလို ပြည်သူတွေလိုအပ်နေတဲ့ ပစ္စည်းတွေကို ပုံမှန်စျေးအတိုင်းရောင်းချပေးနေသူတွေလည်း ရှိကြပါတယ်။ အစ္စလာမ်ဘာသာဝင်တွေဟာလည်း အခုလိုပြည်သူတွေဒုက္ခရောက်နေချိန်မှာ တတ်နိုင်သလောက်လှူဒါန်းမှုတွေ၊ ပစ္စည်းအစုံအလင်ပါတဲ့ အောက်ဆီဂျင်အိုးတွေကို စျေးနှုန်းချိုသာစွာရောင်းချပေးမှုတွေ ပြုလုပ်နေကြပါတယ်။
ယနေ့သြဂုတ်လ(၄)ရက်နေ့မှာတော့ တောင်ဥက္ကလာစွန္နီဂျာမေ့ဗလီ လူမှုကူညီရေးအသင်းဟာ ပြည်သူတွေကို သက်သာတဲ့စျေးနှုန်းနဲ့ ဆန်တွေလိုက်လံရောင်းချပေးနေခဲ့ပါတယ် ။ ရပ်ကွက်အလိုက် ကားနဲ့ လှည့်လည်ပြီး ဆန်တစ်ပြည်ကို ငွေ(၁၀၀)ကျပ်နဲ့ လိုက်လံရောင်းချပေးနေခဲ့တာဖြစ်ပါတယ်။ ပြည်သူတစ်ဦးကို ဆန်တစ်ပြည် ဝယ်ယူလို့ရပြီး စျေးနှုန်းချိုသာစွာနဲ့ ရောင်းချပေးနေတာကြောင့် ပြည်သူအများအပြားက ဝမ်းသာပျော်ရွှင်စွာနဲ့ လာရောက်တန်းစီကာ ဝယ်ယူနေကြကြောင်း သိရှိရပါတယ်။
တောင်ဥက္ကလာစွန္နီဂျာမေ့ဗလီ လူမှုကူညီရေးအသင်းကတော့ ပြီးခဲ့တဲ့ ရက်ပိုင်းကလည်း ကြက်ဥ(၅)လုံးကို ငွေ(၁၀၀)ကျပ်နဲ့ ရောင်းချပေးခဲ့သေးတာဖြစ်ပါတယ်။ တောင်ဥက္ကလာစွန္နီဂျာမေ့ဗလီ လူမှုကူညီရေးအသင်းကတော့ " ရွေ့လျား ရောင်းချမှု အစီအစဥ်လေး ဆန်တစ်ပြည်ကို (၁၀၀)ကျပ်ထဲနဲ့ တစ်ယောက်ကို တစ်ပြည်နှုန်း ရပ်ကွက်အလိုက် လိုက်လံရောင်းချပေးနေပါတယ် လှူဒါန်းမှု အပေါ် အလ္လာဟ်ရှင်မြတ်သခင်လက်ခံတော်မူပါစေ "ဆိုပြီး ရေးသားထားပါတယ်။ဆန်တစ်ပြည်ကို ငွေကျပ်(၁၀၀)တည်းနဲ့ ရောင်းချပေးနေတဲ့ ဗီဒီယိုဖိုင်ကို ပြန်လည်ဖော်ပြပေးလိုက်ရပါတယ်။
Source : Original Uploder