ကိုဗစ်ရောဂါကူးစက်မှုဒဏ်ကို လူကြီးလူငယ်မရွေးခံစားခဲ့ရပြီး ကိုဗစ်ရောဂါဆိုးကြီးကို တွန်းလှန်နိုင်ခဲ့တဲ့ ပြည်သူတွေလည်းရှိသလို ရောဂါကူးစက်ခံရပြီး အသက်သေဆုံးသွားတဲ့ ပြည်သူတွေလည်း အများအပြားရှိနေကြပါတယ်။ အချို့သက်ကြီးရွယ်အိုတွေဟာလည်း သားသမီးတွေရဲ့ပြုစုစောင့်ရှောက်မှုကြောင့် ရောဂါအခံရှိပေမယ့်လည်း ကိုဗစ်ရောဂါကို ရင်ဆိုင်အံတုနိုင်ခဲ့ကြောင်း သိရှိရပါတယ်။ ယခုမှာတော့ အချို့နေရာတွေမှာ ပြည်သူတွေကို ကိုဗစ်ရောဂါကာကွယ်ဆေးတွေ ထိုးပေးနေပြီဖြစ်ကြောင်း သိရှိရပါတယ်။
ယနေ့သြဂုတ်လ(၄)ရက်နေ့မှာတော့ မုံရွာမြို့က အသက်(၆၅)နှစ်အထက် အဘိုး၊အဘွားတွေကို ကိုဗစ်ကာကွယ်ဆေးတွေ ထိုးပေးခဲ့ပါတယ်။ အခုလိုကာကွယ်ဆေးထိုးပေးရာတွင် အဘိုးအဘွားတွေကို စနစ်တကျနေရာချထားပေးခြင်းမရှိတာကြောင့် နီးနီးကပ်ကပ်တန်းစီပြီး စောင့်ဆိုင်းနေကြရတာ ဖြစ်ပါတယ်။ သရုပ်ဆောင်နေထူးနိုင်ကတော့ အသက်(၆၅)နှစ်အထက်အဘိုး၊အဘွားတွေကို သေသေချာချာနေရာချထားပေးခြင်းမရှိလို့ တစ်ဦးနဲ့တစ်ဦး နီးကပ်နေကြတဲ့ပုံကိုကြည့်ပြီး သူ့ရဲ့အမြင်ကိုပြောလာခဲ့ပါတယ်။
နေထူးနိုင်ကတော့ " အနယ်နယ်အရပ်ရပ်မှာ အသက် (၆၅)နှစ်အထက်တွေ ဆေးထိုးတာစီစဉ်သူတွေ သေချာလေး လုပ်သင့်တယ်လို့မြင်ပါတယ် "ဆိုပြီး လူမှုကွန်ယက်စာမျက်နှာထက်မှာ ရေးသားထားခဲ့ပါတယ်။ ပြည်သူတွေကလည်း အခုလိုဖြစ်ရပ်မျိုး နောက်မဖြစ်ရလေအောင် သက်ကြီးရွယ်အိုတွေကို စနစ်တကျနေရာချထားပေးသင့်ကြောင်း ပြောဆိုနေကြပါတယ်။ ကိုဗစ်ကာကွယ်ဆေးထိုးဖို့အတွက် ကြိတ်ကြိတ်တိုးတန်းစီစောင့်ဆိုင်းနေကြတဲ့ မုံရွာမြို့က အဘိုး၊အဘွားတွေရဲ့ ပုံရိပ်လေးတွေကို ပြန်လည်ဖော်ပြပေးလိုက်ရပါတယ်။
Source: nay htoo naing ' s facebook acc