အောက်ဆီဂျင်စက်ဝယ်ထားပြီး ကူညီမယ့်သူမရှိဖြစ်နေတဲ့ ပြည်သူတစ်ဦးကို Video Call ဖြင့် တပ်ဆင်နည်းအသေးစိတ်ကို ရှင်းပြပေးနေတဲ့ စိန်ဖြိုးလှိုင်

လတ်တလောအခြေအနေမှာ ကိုဗစ်ရောဂါကူးစက်မှုတွေဟာ တစ်နေ့ထက်တစ်နေ့ ပိုမိုများပြားနေဆဲ ဖြစ်ပါတယ်။အောက်ဆီဂျင်ရှုသွင်းဖို့ လိုအပ်နေတဲ့ပြည်သူတွေလည်း ဒုနဲ့ဒေးရှိနေကြတာ ဖြစ်ပါတယ်။ အောက်ဆီဂျင်အိုးရှားပါးမှုပြသနာကြောင့် အသက်ဆုံးရှုံးသွားကြသူများလည်း စိတ်မကောင်းစွာဖြင့် နေ့စဉ်ကြားနေရဆဲ ဖြစ်ပါတယ်။အလှူရှင်တစ်ချို့ကလည်း အောက်ဆီဂျင်အိုးတွေနဲ့ စက်တွေကို ပြည်ပကနေ ဝယ်ယူပြီး လိုအပ်နေတဲ့ ပြည်သူတစ်ချို့ကို ဌားရမ်းပေးနေကြတာကိုလည်း ဝမ်းသာစွာဖြင့် ကြားသိရပါတယ်။

တစ်ချို့ပြည်သူတွေမှာ oxygen concentrator ဝယ်ယူထားပြီး တပ်ဆင်နည်းကို မသိကြသူများလည်း ရှိနေကြတာဖြစ်ပါတယ်။ မကြာသေးခင် နာရီပိုင်းလောက်ကလည်း Sein Phyo&Yi ဆိုတဲ့ လူမှုကွန်ယက်တွင် ဗီဒီယိုလေးတစ်ခုတင်ပေးထားတာ ဖြစ်ပါတယ်။ ဒါကတော့ oxygen concentrator ဝယ်ယူပြီး တပ်ဆင်နည်းမသိတဲ့ ပြည်သူတစ်ဦးကိုvideo call ခေါ်ပြီး သေချာရှင်းပြနေတဲ့ စိန်ဖြိုးလှိုင်ရဲ့ ဗီဒီယိုဖိုင်ပဲ ဖြစ်ပါတယ်။  စက်ကိုတော့ ချစ်သူ ရီရီပွင့်ဖြူမှကိုယ်တိုင်သွားပို့ခဲ့ပြီး စိန်ဖြိုးလှိုင်မှ အွန်လိုင်းကနေ တပ်ဆင်နည်း ပြောပြပေးခဲ့တာ ဖြစ်ပါတယ်။ 

စိန်ဖြိုးလှိုင်နဲ့ ရီရီပွင့်ဖြူတို့ ချစ်သူနှစ်ဦးဟာ လတ်တလောဖြစ်ပေါ်နေတဲ့ ကိုဗစ်ရောဂါကူးစက်ခြင်းမှ ကင်းဝေးစေရန် နေထိုင်စားသောက်ပုံတွေကို ဝေမျှပေးနေပြီး ကျန်းမာရေးနဲ့ သက်ဆိုင်တဲ့ ဗဟုသုတရရှိစေမယ့်အကြောင်းအရာတွေကို ရေးသားပေးနေကြတာ ဖြစ်ပါတယ်။ ပြည်သူတွေသိရှိလိုတဲ့ ကျန်းမာရေးနဲ့ ပတ်သက်တာတွေကိုလည်း SeinPhyo&Yi Facebook Page messenger မှတစ်ဆင့် မေးမြန်းနိုင်ကြောင်းလည်း သတင်းစကားပါးထားပါတယ်။ အားလုံးသိရှိလိုတဲ့ ကျန်းမာရေးဗဟုသုတတွေကို ဝေမျှပေးနေတဲ့ စိန်ဖြိုးလှိုင်တို့ ချစ်သူနှစ်ဦးလည်းကပ်ဆိုးကြီးဘေးကနေ ကင်းဝေးပါစေလို့ ဆုတောင်းပေးရင်း ဒီဗီဒီယိုဖိုင်လေးကိုပါ ဗဟုသုတအနေနဲ့ ကြည့်ရှုကြစေဖို့ တင်ဆက်ပေးလိုက် ရပါတယ်။

Source and Photo Crd-Sein Phyo & Yi’s Facebook Page