ကင်းမြီးကောက်ကို ကမ္ဘာအနှံ့အပြား အပူပိုင်း သစ်တော၊ သဲကန္တာရနှင့်တကွ နှင်းကျတဲ့အရပ်ဒေသမှာပင် တွေ့ရပါတယ်။ ကင်းမြီးကောက်တို့ရဲ့အစာများမှာ သေးငယ်သောပိုးမွှား၊ ပင့်ကူ၊ ဖွတ်ပုတတ်မျိုးဝင်အကောင်ငယ်များ၊ ဖားပြုပ်၊ ပက်ကျိ၊ ခရု ပက်ကျိ စတဲ့ အကောင်ကလေးများအပြင် ကြွက်စသော နို့တိုက်သတ္တဝါကလေးများ ဖြစ်ကြပါတယ်။ ကင်းမြီးကောက်တွေဟာ သူတို့ကို နှောင့်ယှက်ရန်စခြင်းမပြုလျှင် ရန်မမူ တတ်ပဲ လူကိုလည်း သာမန်အားဖြင့် ရန်ပြုဖို့ ခက်ခဲလှပါတယ်။
ထူးဆန်းတဲ့ အချက်ကတော့ ကင်းမြီးကောက်တွေရဲ့ ချစ်တင်းနှီးနှောပုံမှာ များစွာ စိတ်ဝင် စားဖွယ်ကောင်းလှပြီး ကင်းမြီးကောက်အမဟာ အဖိုထက် ကိုယ်လုံးကိုယ်ထည် ကြီးမားပြီး မိမိထံ ကင်းမြီးကောက် အဖိုတစ်ကောင်လာပြီး ချစ်ရေးဆိုလျက်ရှိစဉ် သဘောကောင်းချိန်နဲ့ ကြုံကြိုက်ပြီး စိတ်ကြိုက်နှင့်တွေ့ပါက ကြည်သာစွာပင် လက်ခံတတ်ပြီး အခန့်မသင့်ပါက အဲ့ဒီအဖိုကိုကိုက်သတ်ပြီး စားပစ်တတ်ပါတယ်။ နှစ်ဦးနှစ်ဝ ချစ်ရေးကြည်ဖြူခဲ့လျှင် အဖိုဟာ အမရဲ့လက်မ ၂ ဖက်ကို မိမိ၏လက်မများဖြင့် ညှပ်လျက် အချိန်အတော်ကြာအောင် စုံတွဲလျှက်နေပြီးနောက် မိမိခိုအောင်းရာသို့ ခေါ်ဆောင်သွားတတ်ပါတယ်။ ဒါပေမယ့်လည်း ကာလအတော်ကြာမျှ အတူတကွနေထိုင်ပြီးတဲ့အခါ အမဟာအဖိုကို စားပစ်လိုက်တာက များပါတယ်။
ဒါပေမယ့်လည်း ကင်းမြီးကောက်အမတွေဟာ မိမိသားငယ်များ အပေါ်မှာတော့ များစွာခင်မင်ကြင်နာသည်ကို တွေ့ရတတ်ပါတယ်။ ကင်းမြီး ကောက်တွေဟာ အကောင်လိုက်ပေါက်ဖွားကြပြီး မိခင် ကင်းမြီးကောက်မကြီးဟာ သားငယ်များကို ကျောပေါ်မှာ သယ်ဆောင်ပြီး သွားလာလေ့ရှိပါတယ်။ ကင်းမြီးကောက်ပေါက်စတွေဟာ ကိုယ်လုံးကိုယ်ထည်ငယ်သည်မှအပ အမိအဖဖြစ်သော ကင်းမြီးကောက် ကြီးများနှင့် ပုံသဏ္ဌာန်ချင်းတူလှပြီး ကြိမ်ဖန်များစွာအရေလဲပြီးမှသာ တဖြည်းဖြည်း ကြီးပြင်းကြရတာပဲ ဖြစ်ပါတယ်။
သတင်း အရင်းအမြစ်៖ Cracked