မန္တလေး-မူဆယ် ကုန်ကားတချို့ တရုတ်နိုင်ငံ ကုန်ပစ္စည်းတင်သွင်းမှုကန့်သတ်ချက်ကြောင့် ရပ်နားထားရ

ပြည်တွင်းမှ အများဆုံးတင်ပို့နေသည့် လယ်ယာထွက်ကုန် ဆန် နှင့် သကြားတင်ပို့မှုကို တရုတ်အစိုးရမှ တင်းကြပ်စွာကန် ့သတ်မှုကြောင့် မန္တလေး-မူဆယ် ကုန်ကားတချို့ရပ်နားထားရသည်။"ကုန်စည်တွေသယ်တဲ့တစ်ပိသာ (၇)ကျပ်ကနေ (၁၀)ကျပ်လောက်အထိကျသွားတယ်၊တရုတ်ဖက်က အဝယ်တွေကအဖမ်းအဆီးကြောင့်သိပ်မဝယ်ရဲတော့ ကုန်ကားတွေလဲ အရင်လောက်မထွက်ရဘူးဖြစ်နေတာပေါ့၊နယ်ကားတွေဆို ရပ်ထားကြတယ်"ဟု မန္တလေး-မူဆယ်ကုန်တင်ယာဉ်ကြီးများအသင်းမှ ဦးအေးမင်းကဆိုသည်။

မန္တလေးမှမူဆယ်ကို ဆန်၊သကြား၊ပြောင်း၊ဖရဲ စသည့်ကုန်စသည်များတင်ဆောင်ပါက တစ်ပိသာလျှင် (၆၆)ကျပ်ဝန်းကျင်မှ ယခုအချိန်တွင် (၅၇/၅၆)ကျပ်အထိ ကျဆင်းနေပြီး ကုန်မာအိမ်သုံးပစ္စည်းတင်ဆောင်ပါကတစ်ပိသာလျှင်(၂၈)ကျပ်ဝန်းကျင်အထိ ကျဆင်းလာကြောင်းသိရသည်။ကုန်ကားအများစုမှာ အပြင်ကုန်မရသည့်အခါ တွက်ချေမကိုက်မှုများရှိလာပြီး ရပ်နားထားရသည့်အခြေအနေမျိုးဖြစ်နေသည်။တရုတ်အစိုးရအနေနှင့်လယ်ယာထွက်ကုန်အချို့ကိုနယ်စပ်မှ တရားဝင်တင်သွင်းခွင့်မပြုထားဘဲ ပြည်နယ်အတွင်းလိုအပ်ချက်အပေါ ်မူတည်ကာ အဖမ်းအဆီးများကို လိုသလိုပြုလုပ်လျက်ရှိသည် ဟုလည်းသိရသည်။