ယနေ့ချိန်ထိ ကြီးကျယ်ခမ်းနားနေတုန်းဖြစ်တဲ့ အီဂျစ်တွေရဲ့ ဘုရားကျောင်း

ကာနက်ဘုရားကျောင်းဝန်းကြီး ဟာ နာမည်ကြီး အီဂျစ် သမိုင်းထဲက ရှေးဟောင်း သီဘီးစ် မြို့ရဲ့ အစိတ်အပိုင်း တစ်ခု ဖြစ်ပါတယ်။ နှစ်ပေါင်း ၂၀၀၀ ကျော် ကြာမြင့်ခဲ့ပြီး ဖြစ်ပေမယ့် အခုအချိန်ထိတိုင် အံ့ဖွယ် အဆောက်အအုံ တစ်ခု အဖြစ်တည်ရှိနေဆဲ ဖြစ်ပါတယ်။ Karnak ဘုရားကျောင်းကို ရှေးအီဂျစ်တွေက အဓိက နတ်ဘုရား ၃ ပါး ဖြစ်တဲ့ Amun၊ Mut နဲ့ Khonsu တို့ ကို ရည်စူးပြီး တည်ဆောက်ခဲ့တာ ဖြစ်ပါတယ်။ 

ဘုရားကျောင်းဝန်းဟာ ဧက ပေါင်း ၂၀၀ ကျော်ကျယ်ဝန်းပါတယ်။ ဘာသာတရား အဆောက်အအုံတွေထဲမှာ အန်ကောဝပ်ပြီးရင် ဒုတိယ အကြီးဆုံး အဆောက်အအုံ ဖြစ်ပါတယ်။ တိုင်လုံးကြီးတွေနဲ့ ဆောက်ထားတဲ့ Hypostyle ခန်းမကြီး ဆိုရင်လည်း စတုရန်းပေပေါင်း ၅၄၀၀၀ ကျယ်ပါတယ်။ Transformers: Revenge of the Fallen၊ The Mummy Returns၊ James Bond စတဲ့ ကမ္ဘာကျော်ဇာတ်လမ်းတွေကိုလည်း ဒီနေရာမှာ ရိုက်ကူးခဲ့ပါတယ်။

နှစ်စဉ်နှစ်တိုင်း နတ်ဘုရားတွေက စိုက်ပျိုးရေးလုပ်ငန်းတွေ ပြီးမြောက်အောင်မြင်စေပြီး တဲ့အခါ ကမ္ဘာမြေကြီးဟာ အရမ်း အားအင်ကုန် ပင်ပန်းလာတဲ့ အတွက် အာကာသဆီက စွမ်းအင်တွေကို ပြန်လည်စုပ်ယူရတယ်လို့ ရှေးအီဂျစ်တွေက ယုံကြည်ကြပါတယ်။ ဒီလို ကမ္ဘာကြီးက စွမ်းအင်ရယူတဲ့ အထိမ်းအမှတ်အနေနဲ့ Opet ပွဲတော်ကို Karnak ဘုရားကျောင်းဝင်းထဲမှာ နှစ်စဉ်ကျင်းပခဲ့ကြပါတယ်။ ပွဲတော်ချိန်ဟာ ၂၇ ရက်ကြာမြင့်ပါတယ်။

ပွဲတော်ကျင်းပနေစဉ် အချိန်မှာ Amun နတ်ဘုရား ရုပ်ထုကို ဘုရားကျောင်းဝင်းထဲက မြင့်မြတ်တဲ့ ရေနဲ့ သန့်စင်ပြီးတဲ့နောက် ပိုးထည်တွေ ဝတ်ဆင်ပေးကြပါတယ်။ ရွေတွေ၊ ငွေတွေ၊ ကျောက်သံပတ္တမြားတွေ ဆင်ယင်ပေးကြပါတယ်။ အဲ့ဒီနောက် နတ်ဘုရားရုပ်ထုကို ပလ္လင်ပေါ်တင်ပြီး ဝါးလုံးတွေနဲ့ စည်းနှောင်ထားတဲ့ ဝါးထမ်းပိုးပေါ်တင်ကာ ဘုရင်နဲ့ အတူ လမ်းပေါ်ကို လှည့်လည်သွားကြပါတယ်။ 

သတင်း အရင်းအမြစ်៖ Cracked