အရှုံးကိုအပြုံးနဲ့သိမ်းတဲ့ လေးစားဖွယ်စိတ်ဓါတ်ပိုင်ရှင် ရဲနောင် အတွက် ပရိတ်သတ်တို့ရဲ့ စကားသံများ

ဂီတကိုချစ်မြတ်နိုးတဲ့ မအူပင်မြို့က ၀ါသနာရှင်လေးတစ်ယောက် အမေပေးတဲ့ ငွေတစ်သောင်းကိုပိုက်ပြီး Myanmar Idol ပြိုင်ပွဲဝင်ဖို့ထွက်လာခဲ့ပါတယ် ။ ဒါဟာသူ့ရဲ့ပထမဆုံးပြိုင်ပွဲတော့မဟုတ်ခဲ့ပါဘူး ။ သူချစ်တဲ့ ဂီတခရီးလမ်းမှာ နေရာတစ်ခုရဖို့ ကိုယ်စွမ်းရှိသလောက် အမြဲကြိုးစားနေခဲ့သူပါ ။ ကြိုးစားမှုတွေအတွက် အရာထင်လာတဲ့တစ်နေ့မှာတော့ သူ့ရဲ့ ကိုယ်တိုင်ရေးသီချင်းလေးကို နားထောင်ပေးပြီး သူ့ကိုမြေတောင်မြှောက်ပေးဖို့ Myanmar Idol ကဒိုင်တွေက ဆုံးဖြတ်လိုက်ပါတယ် ။ သေချာတာကတော့ သူ့ဘဝမှာ အပျော်ဆုံးနေ့တစ်နေ့ဖြစ်ခဲ့မယ်ဆိုတာပါပဲ ။

သူ့ကို အသိအမှတ်ပြုပေးတဲ့သူတွေက ဒိုင်တွေတင်မဟုတ်ပါဘူး ... ပရိတ်သတ်တွေရဲ့ ရင်ထဲကိုပါ သူနေရာယူနိုင်ခဲ့ပါတယ် ။ သူ့ကိုအားပေးတဲ့ ပရိတ်သတ်တွေအတွက် သူရေးတဲ့ကိုယ်ပိုင်သီချင်းလေးတွေကို လူမှုကွန်ယက်ကနေ ဖြန့်ဝေပေးပြီး သူ့ကိုအားပေးတဲ့ ပရိတ်သတ်နဲ့ သူ အပေးအယူမျှခဲ့ပါတယ် ။ အသံပိုင်းဆိုင်ရာ အားနည်းချက်လေးအချို့ကို ဒိုင်တွေက ထောက်ပြခဲ့တာတောင် သူ့ပရိတ်သတ်တွေက အချစ်လျော့မသွားခဲ့ပါဘူး ။ ပြိုင်ပွဲတစ်လျှောက်လုံးမှာ Vote အများဆုံးရခဲ့ဖူးသူအဖြစ်ရော ယခုနောက်ဆုံးထွက်ခွာချိန်မတိုင်ခင်ထိ တစ်ခါမှ Bottom မှာမထိုင်ခဲ့ရသူအဖြစ်ပါ သူ့ပရိတ်သတ်တွေကသူ့အတွက်တာဝန်ကျေခဲ့တာပါ ။

အခြားပြိုင်ပွဲဝင်မောင်နှမတွေထွက်ခွာရချိန်တိုင်း ငိုကြွေးခဲ့တဲ့ သူက တကယ်တမ်းသူကိုယ်တိုင် ထွက်ခွာရချိန်မှာတော့ အပြုံးမပျက်ခဲ့ပါဘူး ။ နှုတ်ဆက်သီချင်းကိုအကောင်းဆုံးသီဆိုဖျော်ဖြေပေးခဲ့ပြီး ကျေးဇူးတင်စကားပြောရင်း ကျန်ရှိတဲ့ ပြိုင်ပွဲဝင်တွေကို ဆက်လက်အားပေးဖို့ Vote တွေပေးကြဖို့ပါ ပရိတ်သတ်ကြီးကိုတောင်းဆိုပေးခဲ့ပါတယ် ။ ပြိုင်ပွဲကနေရာကိုကျောခိုင်းခဲ့ရပေမယ့် သူ့ပရိတ်သတ်တွေရဲ့ ရင်ထဲမှာနေရာအများကြီးရသွားခဲ့တာပါ ။ ပွဲပြီးတဲ့နောက်မှာ လူမှုကွန်ယက်တွေပေါ်တက်လာတဲ့ ပရိတ်သတ်တွေရဲ့ ရင်ထဲကစကားသံတွေကို စုစည်းဖော်ပြပေးလိုက်ပါတယ် ။

Photo Credit to Original Post Owner