မိုးရာသီမှာ တုတ်ကွေးရှောင်ကြမယ်

Admin ကတော့ မိုးရာသီကို အမုန်းဆုံးပဲ ကြိုက်တဲ့သူတွေလည်းရှိမှာပါ။ ဘာလို့လဲဆိုတော့ အိမ်မှာလဲ စိုထိုင်းထိုင်း ၊ အလုပ်သွားကျောင်းသွား ကားစီးတော့လည်း စိုထိုင်းထိုင်းနဲ့ နေရထိုင်ရတာမကောင်းဘူး။ မလန်းဆန်းသလိုခံစားရတယ်။ ရောဂါလဲ ပိုဖြစ်တယ်။ ဒါ့ကြောင့်မိုးတွင်းကို မုနး်တယ်ကွယ်။

ဒါပေမယ့်လည်း တစ်နေ့တစ်နေ့ အလုပ်သွားကျောင်းသွားနေကြရတဲ့ ကျောင်းသားတွေ၊ ဝန်ထမ်းတွေအားလုံးကတော့ မိုးရေတွေနဲ့ ဘယ်ရှောင်လွဲလို့ရပါ့မလဲနော်။ ဒီတော့ အအေးမိ ကိုယ်တွေလက်တွေနာကျင်ကိုက်ခဲပြီး ဖျားပြန်ပြီ၊ နာပြန်ပြီ မဖြစ်ရလေအောင် မိုးရာသီမှာ တုတ်ကွေးရန်က ကာကွယ်ဖို့ လိုအပ်လာပါပြီ။ ဒီတော့ အအေးမိတုတ်ကွေးကနေ ကာကွယ်ပေးဖို့လာပါပြီ။ ပရိသတ်တွေအတွက် နည်းလမ်းကောင်းလေးတွေ ကို တစ်ဆင့်ပြန်လည်မျှဝေတဲ့သဘောပါ။

လက်ဆေးပါ

လက်ကို မကြာခဏဆေးပါ။ ပိုးမွှားအများစုက လက်ကနေတစ်ဆင့် ကူးစက်ကြတာပါပဲ။ ပိုးမွှားတွေရှိနေတဲ့ အရာဝတ္တုတွေကို သင့်ရဲ့လက်နဲ့ ထိတွေ့ကိုင်တွယ်မိလို့ပဲဖြစ်ဖြစ်၊ တုတ်ကွေးဖြစ်နေတဲ့သူနဲ့ လက်ချင်းကိုင်တွယ်မိလို့ပဲဖြစ်ဖြစ် ဒီရောဂါပိုးမွှားတွေက အလွယ်တကူနဲ့ သင့်ဆီကို ကူးစက်လာနိုင်ပါတယ်။ ဒါကြောင့် လက်ဆေးပါ။ အစားစားခါနီးတိုင်းဆေးပါ။ လက်မဆေးတာ အချိန်ကြာသွားပြီလို့ ခံစားရတိုင်း လက်ဆေးပါ။ လက်ဆေးခြင်းက သင့်ကို တုတ်ကွေးဖြစ်ခြင်းကနေ ကာကွယ်ပေးပါလိမ့်မယ်။

သန့်ရှင်းပါ

ပတ်ဝန်းကျင်ကို တစ်နေ့တစ်ကြိမ်လောက်တော့ အနည်းဆုံးသန့်ရှင်းပါ။ အထူးသဖြင့် စာရေးစားပွဲတွေ၊ ထိုင်ခုံတွေနဲ့၊ လက်ကိုင်တန်းတွေပါပဲ။ ဒီနေရာတွေကို သင့်ထက်အရင် တုတ်ကွေးပိုးရှိတဲ့သူတွေ လာပြီးထိတွေ့ကိုင်တွယ်သွားမယ်ဆို နောက်မှာ ထိတွေ့ကိုင်တွယ်တဲ့ သင့်အတွက်လည်း တုတ်ကွေးနိုင်ချေရှိပါတယ်။ နောက်ပြီး တုတ်ကွေးပိုး ၅၀ ရာခိုင်နှုန်းက ဒီလိုမျက်နှာပြင်နေရာတွေမှာ ရှိနေပါတယ်လို့ နိုင်ငံတကာကျန်းမာရေးသုတေသီတွေက ပြောထားပါတယ်။ ဒါကြောင့် အများသုံးနေရာတွေက ကွန်ပြူတာတွေနဲ့ ဘတ်စ်ကားလက်ကိုင်တန်းတွေက သန့်ရှင်းနေဖို့လည်း လိုပါသေးတယ်။

ရေသောက်ပါ

ရေသောက်ပါဆိုတဲ့နေရာမှာ ရေဘယ်လိုသောက်ရမလဲဆိုတော့ များနိုင်သမျှ များများသောက်ဖို့ပါပဲ။ ဘယ်လိုကျန်းမာရေးပြဿနာအတွက်မဆို ရေသောက်ခြင်းက ဘုံဖြေရှင်းနည်းအဖြစ် ရှိနေပါတယ်။ တုတ်ကွေးပိုး အလွယ်တကူ သင်တို့ရဲ့ ကိုယ်ခန္ဒာထဲကို မဝင်နိုင်ဖို့ သင်ဟာ ကြံ့ခိုင်သန်စွမ်းနေဖို့ လိုအပ်ပါတယ်။ အဲဒီလို ကြံ့ခိုင်သန်စွမ်းနေဖို့အတွက် ရေကတော့အကောင်းဆုံးအားဆေးတစ်ခုပဲ ဖြစ်ပါတယ်။

ကိုယ်လက်လှုပ်ရှားပါ

မိုးအေးအေးလေးနဲ့ စောင်လေးခြုံပြီး ကွေးနေဖို့ မစဉ်းစားပါနဲ့နော်။ မိုးရာသီလည်း ကိုယ်လက်အားကစားလုပ်ရမှာပါပဲ။ ဒါမှပဲ သင့်ကို ပြင်ပရောဂါတွေ ဝင်မလာနိုင်အောင် သင့်ကိုယ်သင် တားဆီးပြီးသားဖြစ်မှာပါ။ ကွေးလေလေ သွေးလေးလေလေ လူက တုတ်ကွေးချင်လာလေလေပဲဖြစ်လို့ ထိုက်သင့်တဲ့ကိုယ်လက်လှုပ်ရှားမှုကိုတော့ မပျက်စေနဲ့ပေါ့နော်။

အအေးမခံပါနဲ့

ဘယ်လောက်ရေချိုးကြိုက်ကြိုက် မိုးတွင်းဆို ရေကို ၁၅မိနစ်ထက် ပိုမချိုးပါနဲ့။ မိုးရေထဲက ပြန်လာရင် ဆံပင်က ရေတွေကိုလည်း သေချာသုတ်ပေးဖို့ လိုအပ်ပါသေးတယ်။ အထူးသဖြင့် မိန်းကလေးတွေ ခေါင်းလျှော်ပြီးလို့ပဲဖြစ်ဖြစ် မိုးရေစိုလို့ပဲဖြစ်ဖြစ် ဆံပင်မှာရေတွေစိုနေပြီဆို ဒီအတိုင်းမထားပါနဲ့နော်။ ဒါက သင့်ကို တုတ်ကွေးဖြစ်စေဖို့ ရှေ့့ဆောင်လမ်းပြပေးနေသလိုပါပဲ။ အဝတ်အစားတွေလည်း ထို့နည်းတူပါပဲနော်။ အအေးမခံပါနဲ့။

မိုးကလေးကရွာ လူကလည်းဖျားချင်ချင်ဖြစ်လာပြီဆို သွားပြီနော်။ အလုပ်ပျက် ကျောင်းပျက်တွေ ဖြစ်ကုန်တော့မှာပေါ့။ ကြိုတင်ကာကွယ်ခြင်းက ကုသခြင်းထက် ထိရောက်တယ်ဆိုတဲ့စကားအတိုင်း တုတ်မကွေးခင် ကြိုတင်ကာကွယ်ထားမှ မိုးတွင်းဆိုတာ တော်ရာကျမှာနော်။

သတင်းအရင်းမြစ် moda